Hús dagsins: Munkaþverárstræti 28

Munkaþverárstræti 28 byggði Henning Kondrup árið 1944, og var byggingaleyfi hans afgreitt fjórum dögum fyrir stofnun Lýðveldisins Íslands á Þingvöllum. En það var þann 13. júní 1944 sem Henning var heimilað að reisa íbúðarhús úr steinsteypu, eina hæð á kjallara með lágu risi, neðri hæðin steinsteypt með steinlofti en efri hæð hlaðin úr r-steini. Teikningar að húsinu gerði Guðmundur Gunnarsson. Enda þótt byggingaleyfi segði fyrir um lágt ris varð raunin sú að þak hússins var flatt, alltént segir í Húsakönnun 2015 að húsið hafi síðar fengið valmaþak. En á upprunalegum teikningum er gert ráð fyrir slíku þaki.

Munkaþverárstræti 28 er steinsteypuhús, einlyft með lágu valmaþaki og á háum kjallara. Bárujárn er á þaki og veggir múrsléttaðir. Á hæð eru svalir til suðurs. Inngöngudyr eru að norðvestanverðu og eru tröppur að þeim yfirbyggðar, þ.e. þakið  slúttir yfir. Á norðurhlið eru gluggar með margskiptum póstar, þar af er annar við útitröppur. Annars eru  einfaldir lóðréttir póstar í gluggum hússins. Húsið er í góðri hirðu og lítur vel út og mun næsta lítið breytt frá upphafi, og er í húsakönnun 2015 sagt hluti raðar samstæðra funkishúsa, og telst þannig með 1. stigs varðveislugildi. Myndin er tekin þ. 18. feb. 2018

Heimildir:

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf

Bygginganefnd Akureyrar. Fundargerðir 1935-41.  Fundur nr. 979, 13. júní 1944.

Óprentað og óútgefið; varðveitt á Héraðsskjalasafninu á Akureyri.