Hús dagsins: Munkaþverárstræti 29

Munkaþverárstræti 29 mun vera byggt árið 1951, en ekki gat höfundur fundið neinar heimildir um húsið í fundargerðarbókum Bygginganefndar frá árunum 1948 – 57. Alltént kemur Munkaþverárstræti 29 hvergi fyrir í „registrum“ í fundargerðunum, og ekki gat höfundur séð það í neinum fundargerðum áranna 1950 og 1951. Nöfn þeirra sem skráð eru til heimilis þarna fyrstu ár eftir byggingu er heldur ekki þar að finna. (Að sjálfsögu er sá fyrirvari, að höfundi hafi einfaldlega yfirsést eða hreinlega ekki leitað nógu vel). Teikningarnar gerði Tryggvi Jónatansson og vera má, að hann hafi stýrt byggingu hússins.

 Árið 1954 búa þarna skv. Íbúaskrá þau Agnar Tómasson og Sigurlaug Óskarsdóttir,en þar kemur fram að þau hafi flutt út það ár. Þá fluttu í húsið þau Friðrik Adolfsson og Jenný Lind Valdimarsdóttir og leigðu þau húsið af Sambandi íslenskra samvinnufélaga. Elsta heimildin sem finna má á timarit.is er frá september 1953 þar sem Jóna Kjartansdóttir óskar eftir stúlku til innanhússtarfa.  Árið 1962 keyptu húsið þau Stefán Stefánsson verslunarstjóri hjá KEA og María Jónína Adolfsdóttir og bjuggu þau þarna um árabil.  Byggðu þau við húsið um 1967, álmu til austurs en teikningarnar að henni gerði Birgir Ágústsson. Húsið er einlyft steinsteypuhús með einhalla þaki til tveggja átta, þ.e. þak eystri hluta hallar til vesturs en þak vestri hluta, viðbyggingar hallar til austurs. Gluggar eru með einföldum póstum og þakdúkur eða pappi á þaki. Á miðri suðurhlið er sólskáli og á lóðarmörkum er upprunaleg girðing, steyptir stöplar með járnavirki. Á framhlið er mjótt útskot eftir hálfri hlið og inngöngudyr í kverkinni á milli. Meðalaldur húsa við Munkaþverárstræti árið 2018 er 80 ár, og er Munkaþverárstræti 29, byggt 1951, annað yngsta húsið við götuna. Það er engu að síður í góðu samræmi við heildarmynd götunnar, enda er aldursmunur hússins og nærliggjandi húsa svosem ekki sláandi. Húsið er hluti hinnar löngu og samstæðu heildar funkishúsa við götuna, og viðbygging þykir vera lítt áberandi, skv. Húsakönnun 2015, sem metur húsið með 1. stigs varðveislugildis, líkt og langflest húsin við Munkaþverárstræti. Á lóðarmörkum er upprunaleg girðing, steyptir stöplar með járnavirki og lóðin vel gróin og í góðri hirðu. Myndin er tekin sunnudaginn 18. febrúar 2018 en þann dag brá sá sem þetta ritar sér í ljósmyndaleiðangur um nyrðri hluta Munkaþverárstrætið.

Heimildir:

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf

Íbúaskrá Akureyrar 1954. Varðveitt á Héraðsskjalasafninu á Akureyri.

Spjaldskrármanntal á Akureyri 1951- 60. Varðveitt á Héraðsskjalasafninu á Akureyri.

Athugasemdir

[Valdimar Leó Friðriksson (IP-tala skráð) 21.9.2018 kl. 11:15]

Sæll vertu

Mig langar að koma með ábendingar.

1)Þau sem keyptu húsið 1962 Sambandi íslenskra Samvinnufélaga voru hjónin Stefán Stefánsson og María Jónína Adolfsdóttir.

Systir Maríu, Guðrún Adolfsdóttir bjó með eiginmanni sínum, ÁsgrímiG. Stefánssyni á öðrum stað í sömu götu.

2) Foreldrar minir leigðu húsið af Sambandi íslenskra Samvinnufélaga frá 1954 til 1962.Faðir minn hét Friðrik Adolfsson og móðir mín heitir Jenny Lind Valdimarsdóttir.

Það voru systkyni María, Guðrún og Friðrik.

Kveðja

Valdimar Leó Friðriksson

[Arnór Bliki Hallmundsson, 22.9.2018 kl. 10:01]

Heill og sæll Valdimar

Þakka kærlega gagnlegar ábendingar; rétt skal vera rétt. Það kemur einmitt fram í spjaldskrármanntali Akureyrar 1954, að þau Agnar og Sigurlaug hafi flutt út á árinu. Þá hefur nöfnum þeirra systra hefur greinilega slegið saman hjá mér,biðst velvirðingar á því; Guðrún Adolfsdóttir og Ásgrímur bjuggu auðvitað í Munkaþverárstræti 37 sem ég fjallaði um nýlega hér. Eitt er víst, að ég ætla að athuga hvort ég finni ekki einhverjar færslur tengdar SíS í bókunum Byggingarnefndar frá 1950-´51.

Bestu kveðjur og þakkir,

Arnór Bliki.