Enn ein strætósagan

Ég geri þó nokkuð af því að ferðast í strætisvögnum. Þar heyrir maður oft ýmislegt spaugilegt og sl. haust deildi ég með lesendum nokkrum sögum úr strætó. ( sjá hér og hér ). En hér er önnur saga. Það var eitt sinn sem ég var í strætó sem fór um Brekkuna. Þetta var um ellefuleytið að morgni virks dags og vagninn nánast tómur. Farþegar voru einungis ég og eldri kona, sem var greinilega málkunnug vagnstjóranum. Þegar vagninn hafði farið framhjá framhaldsskólunum heyrði ég konuna segja: "Mikill óskapa fjöldi er þetta af bílum þarna hjá skólunum "  "Nei, þetta eru sko ekki blankir krakkar" svarar vagnstjórinn. " Nei, svo sannarlega ekki. Þetta var nú ekki svona þegar ég var í menntaskóla árið 1950, þá var það algjör undantekning ef nemandi átti bíl" segir sú gamla. Bílstjórinn jánkar þessu. En allt í einu skipti sú gamla um gír ( alls ekki bílstjórinn því vagninn var sjálfskiptur ). Í beinu framhaldi af þessu kom heljarinnar reiðilestur um óráðsíuna og lífsgæðakapphlaupið sem tröllreið öllu, allir þyrftu að eiga allt og allt þyrfti að gerast núna, svona hugsuðu allir og þetta væri haft fyrir aumingja börnunum og þessi djöfulsins vitleysa næði bara ekki nokkurri átt. Þessari þrumuræðu fylgdu einhverjar reynslusögur af eigin nægjusemi og konunni var greinilega mikið niðrifyrir, gott ef hún steytti ekki hnefann einhverntíma með orðaflaumnum. Bílstjórinn hlustaði með hálfum huga og jánkaði á réttum stöðum. Svo róaðist hún jafn skjótt niður og fór að tala eitthvað allt annað.

Það er kannski rétt að láta það fylgja með hvaða ár þetta var. Þetta var nefnilega á vordögum árið 2007.

Hús dagsins : Kaupangsstræti 6 og Ketilhús

    Myndirnar sýna Kaupangsstræti 6 fyrir (t.v.) og eftir viðgerð, 11.feb og 31.ágúst 2007. Ketilhús til vinstri.

Elsti hluti Kaupangsstrætis 6 var reistur árið 1907 og mun það hafa verið sá hluti sem næst er á myndinni. Byggingin í miðjunni með háa risinu og byggingin vestur úr henni eru síðari tíma viðbyggingar. Líklega var húsið frá upphafi í eigu KEA en þetta var þeirra fyrsta verksmiðjuhúsnæði. Upprunalega eða alltént mjög snemma var þarna sláturhús og mjólkursamlag. Yfir dyrunum í kjötbúðina mun í fyrndinni hafa hangið forláta nautshaus. Sá var endurnýjaður við endurgerð hússins eins og sjá má myndinni hér að ofan. Hús þetta er þekkt undir nafninu Bögglageymslan en þarna var um árabil, um og eftir miðja síðustu öld bögglaafgreiðsla og geymsla. Aftan hússins stóð mikil tvílyft bygging, Fóðurgeymslan. Sú bygging brann um 1980 en grunnur hennar stendur enn og er notaður sem bílastæði. Þegar endurbætur hófust á húsinu 2007 hafði það staðið ónotað í áratugi. Var húsið, þ.e. bakhlið lengi vel vinsælt með veggjakrotara og oft voru þarna mikil listaverk í bland við fúkyrði og skilaboð um hver væri asni og hver er elskaði hvern o.s.frv. Endurbætur á húsinu fóru fram fyrri hluta árs 2007 og 12.júlí s.á. flutti veitingstaðurinn Friðrik V í húsið. Myndirnar með færslunni sýna einmitt húsið fyrir og eftir endurbyggingu.

Athugasemd 28.jan:  Í fyrirsögninni minntist ég á Ketilhús en virðist hafa steingleymt að skrifa eitt einasta aukatekið orð um það. Sem er bara alls ekki nógu gott. En Ketilhús er bláa stórhýsið á myndinni. Var það reist 1948 af KEA og hýsti mikla olíukatla sem sáu verksmiðjuhúsunum í Gilinu fyrir gufu og hita. Uppúr 1990, þegar farið að byggja upp menningarstarfsemi í Gilinu var byrjað að nota húsið undir listasýningar og ýmsar uppákomur. Þarna voru líka haldnir ýmsir markaðir, man ég t.d. eftir útsölumörkuðum á geisladiskum þarna. Nú er sennilega nærtækast að kalla húsið tónleika- og fundarsal.  Salurinn í Ketilhúsi er nokkuð sérstæður, tiltölulega langur og mjór og lofthæðin gríðarleg.  Í salnum er svo lítið innbyggt rými ( sem líkja mætti við stúku í íþróttasal, en þó eru engar hallandi sætaraðir )  en þar aðstaða fyrir umsjónar- og starfsfólk viðburða. 

 

Líf og fjör í Sögugöngum.

Í færslunni áðan kom ég inn á viðburði sem kallast sögugöngur. En um árabil hefur Minjasafnið ( eða tengdar stofnanir)  staðið fyrir sögugöngum um gömlu bæjarhlutana Oddeyrina og Innbæinn á sumrin. Er þá gengið undir leiðsögn um helstu göturnar, Aðalstræti og Hafnarstræti í Innbænum og Strandgötu og hliðargötur hennar á Oddeyri, og stoppað fyrir framan merk hús og saga þeirra sögð og þeirra sem þar bjuggu. Það er reyndar misjafnt hverjar áherslurnar eru eftir leiðsögumönnum. Sumir leggja meiri áherslu á fólkið og sögur af því en aðrir fjalla meira um húsin sjálf, sögu þeirra og byggingargerð. Stundum hefur verið stoppað fyrir framan hvert einasta hús og sagt frá en oftast eru það bara valdir staðir, enda yfirleitt tímarammi (1-2klst ) á þessum göngutúrum. Meðal þátttakenda eru oftar en ekki gamlir Innbæingar eða Oddeyringar sem kunna oft mjög áhugaverðar sögur frá þessum svæðum. Oftar en ekki man þetta fólk af eigin reynslu fólk og atburði sem maður hefur aðeins lesið um í bókum. Ég hef stundað þessar göngur allar götur frá sumrinu 1997, eða frá því ég flutti til Akureyrar ( var búsettur í Eyjafjarðarsveit áður ) og reyni að öllu jöfnu að komast í a.m.k. eina slíka á sumri. Jafnvel þótt maður kunni orðið efnið nánast utanað er alltaf gaman að kíkja með og alltaf er eitthvað nýtt að heyra.

Hús dagsins: Aðalstræti 44

Aðalstræti 44 mun vera byggt 1840 og er því í hópi allra elstu húsa á Akureyri. Árið 1873 eignaðist húsið kona að nafni Elín E. Thorlacius. Seldi hún þar veitingar og gistingu og var húsið nefnt Elínarbaukur, en bauksnafnið var almennt notað yfir veitingahús á Akureyri. Skilst mér að það hafi komið til af því að veitingamenn voru oftast beykjar* að aðalstarfi. Að öðru leyti hefur húsið lengst af verið íbúðarhús, margar fjölskyldur hafa búið í húsinu og líklega oft á tíðum margar í einu. Allavega hefur einhvern tíma vantað upp á plássið því risinu var einhverntíma lyft** í fyrndinni og byggð tvílyft bakbygging við húsið í framhaldi af því. Þá hafði það á sínum tíma verið asbestklætt og settir þverpóstar í glugga og þannig leit það út þegar endurbætur hófust á því um 2000.  Húsið hefur verið gert upp með nokkuð sérstökum hætti, sem þó mun viðurkenndur innan húsfriðunarfræða. Viðbyggingar voru rifnar og elsta húsið gert upp með upprunalegt útlit í huga, borðaklæðning og sexrúðugluggar. En kröfur til húsnæðis í dag eru dálítið aðrar  en fyrir 170 árum síðan, þannig að eitt og sér dugar gamla húsið skammt. En það mál er leyst þannig: Byggð er lágreist steinsteypt bygging bakvið húsið en byggingar tengdar saman með gangi sem er mjórri en húsin sjálf. Þannig fær gamla húsið að njóta sín til fulls og húsin virðast bæði sjálfstæðar byggingar og þarna eru skörp skil á milli hins gamla og nýja. Í sögugöngu um Innbæinn eitt árið heyrði ég að í þessu húsi sé hægt að ganga á nýmóðins steyptum gólfum um dyr, inn á dúandi og brakandi timburgólf. Myndin með þessari færslu er tekin í úrhellisrigningu; hitaskúr  síðdegis þann 15.ágúst 2009.

*Beykir= tunnusmiður

**Að lyfta risi: Stundum kom það fyrir að fullþröngt var um íbúa húsa undir lágri súð. Oft var lítill kvistur látinn duga en stórtækara verk var að lyfta risinu. Það lýsti sér þannig að þakgrind var tekin niður öðru megin og reistur veggur í staðinn og í stað hallandi riss kom skúrþak; halli á þakinu rétt til málamynda.  Langoftast var þetta gert á bakhlið húsa, enda fylgdu oft frekari viðbyggingar eða inngönguskúrar í kjölfarið, og e.t.v. þótti þetta ekki mikil prýði. 

Hús dagsins: Nokkur hús í 101, Vatnsstígur 4.

Milli jóla og nýárs var ég staddur í Reykjavík og að sjálfsögðu var myndavélin með í för. Á einum göngutúr frá Sóleyjargötu á Laugaveg smellti ég myndum af nokkrum húsum sem vöktu athygli mína. Nú vill svo til að í flestum tilvikum þekki hvorki haus né sporð á þessum byggingum enda skal það viðurkennast að ég er ansi lítið kunnugur í Borginni. Því leita ég til ykkar, lesendur góðir, ef þið þekkið einhver deili á  þessum húsum þá má gjarna gauka einverju slíku að undir athugasemdum.

    Þessi tvö hús standa við Njarðargötu. Stóra steinhúsið ef ég man rétt á horni hennar og Bergstaðastrætis. Ef ég ætti að giska á byggingarár myndi ég halda að timburhúsið sé byggt á bilinu 1900-1920 en steinhúsið gæti verið byggt ca 1935-40.

 

T.v. : Skemmtilega sérstakt í laginu þetta hús við Nönnugötu. T.h. : Þetta glæsilega timburhús stendur á horni Grettisgötu og Frakkastígs. Þetta er líkast til byggt á 1.tug 20.aldar og ekki þykir mér ólíklegt að þetta hús sé norskættað ( sbr. pistil minn um sveitserhús ).

Þetta hús kannast  örugglega margir við. Þetta er Vatnsstígur 4, byggt 1901. Í fyrravor komst það í fréttirnar þegar hópur hústökufólks kom sér þar fyrir. Þar "ráku" þau fríbúð og máluðu og tóku til hendinni við ýmislegt smáviðhald. Að lokum voru þau þó borin út með valdi og húsinu lokað. Nokkrum mánuðum síðar kviknaði í því og skemmdist það töluvert eins og sjá má á myndinni.  En það stendur þó enn. 

 

 

Hús dagsins: Strandgata 35

Strandgata 35 er eitt af elstu húsum Oddeyrar og var lengi vel eitt stærsta húsið þar. Er það kallað Havsteenshús en það reisti Jakob V. Havsteen, danskur kaupsýslumaður og einn helsti stórlax Akureyrar á sinni tíð. Húsið reisti hann 1888. Var það allt hið veglegasta, lengra, breiðara og hærra til lofts en almennt tíðkaðist og kjallari óvenjuhár. Þá gengur tvílyft bakbygging norður og vestur úr húsinu ( á myndinni sést framhlið hússins sem snýr á móti suðri ). Sú bygging mun upprunalega hafa verið geymslu- og gripahús. Lóð hússins er gríðarstór ( og var líkast til enn stærri á dögum Havsteens ) og átti Havsteen einnig fjöruröndina framan hússins og allur reki sem þangað kom varð sjálfkrafa hans eign. Hann reisti  bryggju framan og sjást enn leifar hennar (stubbar af bryggjustólpum, plankar ) í háfjöru.  Húsið er næsta lítið breytt frá upphafi, en á tímabili var húsið klætt steinskífu en upprunalega hefur líklega verið einskonar timburklæðning á því. Lengst til hægri, þ.e. austast á húsinu má sjá tvo glugga sem eru nokkuð stærri en hinir og með öðruvísi póstum. Þar var lengi vel sólskáli með skrautrúðum. Havsteen bjó í húsinu og stundaði þar verslunar- og skrifstofustörf. Ýmis starfsemi hefur einnig verið í húsinu, m.a. var afgreiðsla ÁTVR í kjallara hússins áratugina kringum 1950. Nú eru í húsinu að ég held sex íbúðir fjóra í vesturenda og tvær í austurenda hvor á sinni hæð. Þessi mynd er tekin um miðjan janúar 2005, fyrir réttum fimm árum síðan.

Hús dagsins: Aðalstræti 66 og 66a

Þetta litla hús í Fjörunni, Aðalstræti 66a, mun vera reist árið 1845. Hús nr. 66 er hins vegar baka til á lóðinni og sést hluti þess hægra megin á myndinni. Það hús reisti Grímur Laxdal veitingamaður árið 1843 og rak í húsinu einn fyrsta veitingastað Akureyrar. 66a var upprunalega  reist sem smiðja ( mjög líklega af Grími ) eða verkstæði en tekið til íbúðar seinna. Íbúar þessa húsa gegn um tíðina skipta örugglega hundruðum ef ekki þúsundum en á tímabili munu allt að 6-8 fjölskyldur hafa búið samtímis í Aðalstræti 66. Nú eru þetta hins vegar hvort tveggja einbýlishús og bæði húsin hafa hlotið endurbætur þar sem upprunalegt útlit hefur verið haft til hliðsjónar. Þessi mynd er tekin 15.ágúst 2009.

Gilin á Akureyri

Í síðustu færslu minntist ég á Gilið margfræga eða Grófargil eins og það heitir raunar. Það er einnig kallað Listagil enda ekki að ástæðulausu því þar eru staðsett mörg gallerý, tónleikasalir ( Deiglan, Ketilhús ), Listasafn Akureyrar  sem og Myndlistarskólinn. Hefur þar á síðustu 15-20 árum farið fram markviss uppbygging listastarfs en áður var iðnaðarstarfsemi ríkjandi í gilinu. En Grófargil er aðeins eitt af mörgum giljum sem skera bæjarbrekkuna á Akureyri, en nokkur þeirra bera nöfn og hér ætla ég að fara yfir þau helstu. Nyrst þeirra, samhliða Grófargilinu er Skátagil. Það liggur skáhallt upp frá Hafnarstrætinu (Göngugötunni ) og er brattur göngustígur sem liggur þar neðst uppá bílastæði ofan Amarohússins. Þaðan liggur svo Oddagatan upp að höfðanum þar sem gilin tvö greinast. Á teikniborðinu mun vera mikil uppbygging á Skátagilinu sem útivistarsvæði og er það í tengslum við nýjan og endurbættan miðbæ. Um kílómeter sunnan Grófargils er síðan Búðargil eða Lækjargil eins og það er stundum líka kallað en Lækjargata liggur upp það gil. Það er mest þeirra gilja sem skera Brekkuna. Í norðurhlíð Búðargils voru kartöflugarðar Akureyringa allt frá aldamótunum 1800 eða þar um bil og enn eru ræktaðar þar kartöflur. Þá voru þarna vinsælar skíðabrekkur á vetrum. Norðurendi Kirkjugarðsins nær að suðurbrún gilsins en sá staður kallast Höfðinn (minnir að hann heiti annaðhvort Búðarhöfði eða Naustahöfði "fullu nafni" ). Það er einn af glæsilegustu útsýnisstöðum Akureyrar. Í neðri hluta Lækjargötunnar eru íbúðarhús en við efri hlutann voru lengi vel hesthús, þau síðustu voru rifin um 2005. Fyrir ekki svo löngu síðan var maður eiginlega kominn upp í sveit þegar komið var upp úr Búðargilinu. Beint upp af því var býlið Hlíð  og tún allt um kring. Sunnan Kirkjugarðs, beint upp af Minjasafninu og Nonnahúsi er síðan Skammagil. Þar upp liggur gamall vegur sem var áður leiðin frá Kirkjunni upp í Kirkjugarð. Nú er hann hluti gönguleiðar sem liggur upp Skammagil eftir brekkubrúninni og niður Búðargilið, sk. Nonnaslóð. Lítið eitt sunnar, við veginn ofan Skautahallar er svo Naustagil. Það lætur ekki mikið yfir sér enda mun grynnra en hin gilin sem talin er upp hér og auk þess skógi vaxið að mestu leyti. Þá eru ótalin nokkur gil eða skorningar í brekkunni ofan Flugvallar auk þess sem nokkrir skorningar eru í brekkunni ofan Hafnarstrætis, sá mesti ofan Samkomuhússins. Líklegt þykir að það gil beri nafn en mér er alltént ekki kunnugt um það. Þar upp liggur mjór, snarbrattur og hlykkjóttur stígur sem kallaður er Menntavegurinn. Fyrir gangandi er hann kærkomin stytting á leið uppá Brekku en hann getur verið illfær í hálku og snjó. Um árabil hefur það verið fastur liður í busavígslu Menntaskólans á Akureyri er að láta nýnemana ganga upp Menntaveginn. En þessi stígur kallast hins vegar aðeins Menntavegur þegar farið er upp, á niðurleið nefnist hann Glötunarbraut ! 

 

 

Hús dagsins: Rósenborg, áður Barnaskóli Akureyrar

Fyrsta Hús dagsins á árinu 2010 fagnar stórafmæli, 80 ára, á nýju ári. Þetta er gamli Barnaskóli Akureyrar sem einnig var nefndur Barnaskóli Íslands. Skólinn hefur án efa verið á sínum tíma ein mest áberandi bygging bæjarins en hann stendur á hæð ofan Grófargils* og var á sínum mikið hærri og stóð miklu hærra en stór hluti bæjarins. Húsið telst standa við Skólastíg 2 en lóð þess liggur einnig að Eyrarlandsvegi og Kaupangsstræti*. Barnaskólinn var reistur árið 1930 eftir teikningum Guðjóns Samúelssonar og þótti hin glæsilegasta bygging í alla staði.  Það má teljast eðlilegur hluti skólahúsnæðis að með tímanum verða  þau of lítil fyrir starfsemina. Í tilfelli barnaskólans gerðist það á 20 árum en byggt var við hann árin 1949-50. Hornið á þeirri álmu ( með flötu þaki ) sést vinstra megin á myndinni. Húsið var skólahús í ein 75 ár en í júníbyrjun 2005 hringdi skólabjalla þarna í síðasta sinn. Þá hófust gagngerar endurbætur á húsinu sem miðuðu að því að gera það í senn löglegt undir nútíma starfsemi sem og að halda í upprunan. Það tókst með miklum sóma. Nú hýsir þetta hús félagsmiðstöðvar Akureyrar  og margar skrifstofur á vegum Akureyrarbæjar sem og handverksmiðstöðina Punktinn og ýmsa aðra starfsemi. Kallast húsið Rósenborg, en það nafn var niðurstaða kosninga vorið 2006 þar sem gestir hússins gátu lagt til nöfn. Raunar er erfitt er að finna samheiti yfir alla þá fjölmörgu og fjölbreyttu starfsemi sem fram fer í húsinu en það orð sem notað yfir starfsemi Rósenborgar er Möguleikamiðstöð. Síðast en ekki síst má nefna að menningarmiðstöðin Húsið er rekin á efstu hæðum þessa húss. Þar hef ég verið í hópi fastagesta frá upphafi og einhverjir pistlanna á þessari síðu eru skrifaðir í tölvuverinu þar. Það er í dag staðsett í sömu stofu og neðri myndin er tekin. Myndin hér að neðan er sú fyrsta í Húsapistlunum mínum sem tekin  er inni í húsinu sem fjallað er um, en hún sýnir undirritaðan á góðri stund í Billjard eða Pool. Báðar myndirnar eru teknar 25.apríl 2006.

*Flestir sem heimsótt hafa Akureyri kannast við Gilið, brekkuna bröttu uppúr Miðbænum. Það heitir raunar Grófargil og gatan sem upp það liggur er einmitt Kaupangsstræti.

 

Húsaannáll 2009

Það hefur um nokkurt skeið staðið til hjá mér að gera einhverja samantekt á þeim húsaumfjöllunum sem ég hef birt hér á síðunni. Þetta eru orðin mörg innskot og kannski ágætt að koma einhverju skipulagi á þetta. Áramót eru einmitt kjörið tækifæri fyrir þess háttar  yfirlit. Þetta þýðir þó engan vegin að ég sé hættur þessu. Ég á enn nokkrar óbirtar húsamyndir og auk þess eru nokkur merk hús hér í bæ sem ég á eftir að mynda en finnst eiginlega skylda að taka fyrir hér á síðunni fyrst ég er að þessu á annað borð.  Ég hef ekki sett mér neinar reglur eða skipulag í þessum umfjöllunum, nema ég eigi af húsunum mynd og að öllu jöfnu eru þetta eldri hús sem ég tek fyrir. Stundum er mikil saga á bak við þau en önnur hefur mér einfaldlega þótt það athygliverð að ég hef fest þau á mynd. Oftar en ekki hef notað e.k."eitt leiðir af öðru" reglu, þ.a. ég hef kannski tekið fyrir hús í sama bæjarhluta eða sömu götu í röð. Annars er þetta bara tilviljanakennt hjá mér enda hef ég ekki ætlað mér annað. Pistlana hef ég stuttorða enda eru þeir orðnir til í kringum myndirnar en ekki öfugt. Þá þykir mörgum óspennandi og óþægilegt að lesa langa texta af tölvuskjá. Einhverjum kann að þykja pistlarnir þunnir og skauta yfir ýmislegt en þeim er alls ekki ætlað að vera tæmandi upplýsingar. Ég skrifa einfaldlega það sem ég hef kynnt mér gegn um tíðina og man þá stundina en ef ég fletti einhverju sérstaklega upp eða hef eitthvað eftir sem ég hef aðeins séð á einum stað vísa ég að sjálfsögðu í þær heimildir. Þá er lesendum velkomið að bæta einhverju við nú eða leiðrétta eitthvað  því sem áður segir eru pistlarnir alls ekki fullkomnir. En þá að yfirlitinu. 

JÚNÍ

25. Fyrsta hús dagsins var Norðurgata 17, Gamla Prentsmiðjan eða Steinhúsið. Það hús á stórafmæli á nýju ári, 130 ára.

26. Ég hélt mig í Norðurgötunni og tók fyrir jafn gamalt hús Norðurgötu 11. 

30. Lundargata 2.

JÚLÍ

3. Hafnarstræti 18, Thuliniusarhús

9. Hafnarstræti 31-41.

13. Nokkur eldri steinsteypuhús, Brekkugata 12, Grundargata 7 og Oddeyrargata 6.

16. Aðalstræti 16.

20. Þennan dag brann Aðalstræti 13 og hljóp ég þá til og tók af því myndir. Þetta er eini húsapistillinn hingað til sem er tengdur við fréttir á MBL. Endurbætur á húsinu standa yfir þegar þetta er ritað.

Daginn eftir, 21., tók ég fyrir Lækjargötu 6. Það hús brann einnig og var byggt af sama aðila. Það hús var hinsvegar gert upp og það með miklum sóma. 

23. Strandgata 37-45.

28. Strandgata 49, Gránufélagshúsin.

ÁGÚST

2. Hafnarstræti 11, Laxdalshús. Elsta hús Akureyrar.

10. Hafnarstræti 57, Samkomuhúsið.

12. Hafnarstræti 53, Gamli Barnaskólinn.

17. Aðalstræti 14, Gamli Spítalinn.

20. Aðalstræti 4, Gamla Apótekið.

21. Hafnarstræti 96.

25. Hafnarstræti 94.

27. Hafnarstræti 98.

31. Hafnarstræti 91-93, KEA húsin.

SEPTEMBER

6. Strandgata 27.

14. Lundargata 15. 

OKTÓBER

1. Norðurgata 2 og Strandgata 23.

7. Strandgata 4, Nýja Bíó. 

16. Gránufélagsgata 39-41.

21. Aðalstræti 50.

28. Aðalstræti 46, Friðbjarnarhús.

NÓVEMBER

4. Strandgata 3 og 7, Berghóll (áður Strandgata 5).

9. Strandgata 9-13. 

13. Strandgata 11b.

21. Akureyrarkirkja.

22. Minjasafnskirkjan við Aðalstræti.

25. Hafnarstræti 20. 

26. Hafnarstræti 3.

DESEMBER

3. Aðalstræti 15.

5. Lækjargata 3.

11. Hafnarstræti 90.

19. Strandgata 17.

25. Jólahúsið í Eyjafirði. 

Alls eru þetta 36 pistlar og húsin líklega á milli og 50 og 60. Mér sýnist, án þess að telja það nákvæmlega að flest húsin sem ég hef fjallað um séu í Hafnarstræti og Strandgatan sé í öðru.  Aðalstræti kemur þá líklega í þriðja. Afkastamestur hef ég verið yfir hásumarið, júlí og ágúst. Ef menn vilja skoða þessar færslur er hægt að fara til baka í dagatalinu hér til hliðar og velja dagsetninguna. Ég gafst eiginlega upp á að reyna að búa til tengil á hverja einasta færslu, það hefði verið ógurleg handavinna.