Hús dagsins: Bjarmastígur 8

 

Bjarmastíg 8 reisti Svavar Guðmundsson bankastjóri árið 1952 eftir teikningum Bárðar Ísleifssonar. Í bókunum Byggingarnefndar er lýsingar á húsinu ekki getið, en aðeins vísað í fyrirliggjandi teikningu. Þann 1.nóvember 1948 hafði Útvegsbankinn (Hafnarstræti 107) sótt um að reisa einbýlishús á lóð sinni við Bjarmastíg. Það var samþykkt, enda reiknað með því að skipulagi yrði breytt á þann hátt, að byggt yrði meðfram allri götunni að austan. (Þá voru aðeins risin tvö hús þeim megin, þ.e. Bjarmastígur 2 og 6). Ekki er ósennilegt að hér sé um að ræða umrætt hús, en Útvegsbankinn var til húsa í Hafnarstræti 107, sem liggur einmitt næst austan og neðan þessarar lóðar. Alltént var það bankastjóri Útvegsbankans sem reisti þetta hús. En Bjarmastígur 8 er einlyft steinsteypuhús með háu valmaþaki og stendur það á háum kjallara. Inngöngudyr og steypt verönd á framhlið og steyptar tröppur að honum. Í flestum gluggum eru einfaldir lóðréttir póstar en á suðurhlið og við inngang eru stórir og voldugir gluggar með margskiptum póstum; níu smárúðum (tólf í glugga við inngöngudyr). Neðan þessara glugga eru inndregnar “svuntur” sem gefa húsinu óneitanlegan sérstakan svip. Svavar bankastjóri hefur líkast til ekki búið hér í mörg ár, en hann flutti nokkrum árum síðar til Hamborgar í Þýskalandi. Hann var búsettur þar þegar hann lést, árið 1960.

Húsið hefur alla tíð verið íbúðarhús, en þess má þó geta, að hér var starfrækt bílaleiga, Prinz-leigan á sjöunda áratugnum. Héðan hafa því líkast til verið leigðir út NSU-Prinz smábílar, en þeir voru framleiddir í Vestur Þýskalandi um nokkurra ára skeið um 1960. Mögulega hefur bílskúr, sem stendur norðan við húsið, nýst eitthvað við bílaleiguna en fyrir honum fékk Svavar Guðmundsson byggingarleyfi haustið 1953. Húsið er í góðu standi og lítur vel út, traustlegt og reisulegt að sjá. Stórbrotnir gluggar gefa húsum ævinlega sérstakan og einkennandi svip og svo er vitaskuld tilfellið með margskiptu gluggana á Bjarmastíg. Lóð hússins er stór og vel gróin, þar má finna hálfgerðan skóg af grenitrjám neðst og austast. Sunnan við húsið, nær götu eru tvö mikil lerkitré. Annað þeirra, eða það syðra, er sérlega skemmtilega vaxið en stofn þess greinist mjög reglulega í þrennt svo minnir á kampavínsglas eða eitthvað þess háttar. (Sjá mynd) Lerkitré þessi eru á að giska 15 metrar á hæð, a.m.k. Myndirnar eru teknar að kvöldi Uppstigningadags, 25.maí 2017.

 

Heimildir: Bygginganefnd Akureyrarbæjar. Fundargerðir 1948-57. Fundur nr.1104, 1.nóv. 1948, fundur nr.1141, 17.ágúst 1951, fundur nr. 1179, 9.okt. 1953. Óprentað, varðveitt á Héraðsskjalasafninu á Akureyri.

 

Landslag arkitektastofa 2014. Akureyrarbær Miðbær- Húsakönnun. Unnið fyrir Akureyrarbæ. Óprentað, pdf aðgengilegt á slóðinni http://www.minjastofnun.is/media/husakannanir/midbaer_husakonnun-2014.pdf