Athyglisverðar götur á Akureyri

Sá sem hefur stundar það að ganga um götur Akureyrar tekur fljótlega eftir ýmsu athyglisverðu varðandi númer í sumum götum. Tökum sem dæmi tvær langar, samsíða götur á Brekkunni. Byggðavegur og Þórunnarstræti liggja frá Gleráreyrum, Þórunnarstræti nær suður að Naustahverfi en Byggðavegur að Dvalarheimilinu Hlíð. Húsnúmerin neðst í götunum eru á öðru hundraði, Byggðavegur nær í 100 sextíuogeitthvað og Þórunnarstræti 136, enda göturnar langar. En reyndu að ganga þessar götur á enda og finna Byggðaveg 1 eða Þórunnarstræti 2. Það gæti reynst erfitt. Tilfellið er nefnilega, að þessar götur byrja báðar á áttatíuogeitthvað. Ekki kann ég að nefna ástæðu þess, en líklegt þykir mér að göturnar hafi verið skipulagðar þannig upprunalega að þær næðu lengra og húsalóðir við þær alla leið. Í sumum götum vantar alveg sum númer, t.a.m. er röðin Hafnarstræti 49-71 eftirfarandi: 49,53, 57, 63, 71. Þarna á milli eru reyndar mikil stórhýsi, Gamli Barnaskólinn, Samkomuhúsið og Sjónarhæð.

Nú þekki ég ekki til annars staðar en vel gæti ég trúað að  mörg samskonar dæmi megi finna í öðrum bæjarfélögum en Akureyri. En ein er sú gata á Oddeyrinni sem hefur sennilega eitt furðulegasta númerakerfi sem finnst á byggðu bóli.

Nefnilega Gránufélagsgata. Hún liggur samsíða Strandgötu í A-V og nær  frá ÁTVR í miðbænum og niður að sjó. Frá Glerárgötu er röðin að austan eðlileg frá 12-22, en hús nr. 12 er upprunalega nr. 28. Að vestan er röðin hefðbundin 19, 21, 23 og 27. En við hliðina á 27 stendur 39,41a og 41. Þessi hús eru ein heild, stórt þrílyft steinhús, kallað Sambyggingin. Neðan 41 stendur svo 43, eins og vera ber. En svo heldur gatan áfram frá 29, neðan við 43. Hús nr. 16 stendur beint á móti 43 og beint á móti 33 er 22. H.u.b. hvert einasta sumar frá 1997 hef ég farið í sögugöngur Minjasafnsins um Oddeyrina og aldrei hefur neinn, hvorki leiðsögumaður eða þátttakandi ( sem oft eru margir býsna fróðir um Eyrina ) haft svo mikið sem minnstu hugmynd um ástæðuna fyrir þessu. Það er svo sannarlega margt skrýtið í kýrhausnum.

Gránufélagsgatan á vordegi 2006. Hér sjást hús nr. 39-41 og svo 27 þar við hliðina. Hlíðarfjall í fjarska í baksýn.

Athugasemdir

[Arnór Bliki Hallmundsson, 4.7.2009 kl. 20:47]

Við þetta má kannski bæta að ég bjó í Gránufélagsgötu 27 í tvö ár (1997-99). Fínasta hús á frábærum stað. Oft kom það fyrir að fólk frá póstinum bankaði upp á til að spyrja um tiltekin hús í Gránufélagsgötunni, skildi hvorki upp né niður í neinu.

[Bjarki (IP-tala skráð) 9.7.2009 kl. 11:28]

Mýrarvegur er eins. Byrjar á 111 og 114 og kallast á við húsnúmer á Byggðavegi og Þórunnarstræti þar neðan við sem eru á sama bili.

Ég bölvaði Gránufélagsgötunni talsvert þegar ég vann á póstinum. Eins og þetta ruglaða númerakerfi sé ekki nóg þá átta margir sig ekki á því að tvö hús ofan Glerárgötu tilheyra Gránufélagsgötu, þ.e. nr. 4 (JMJ húsið) og nr. 7. Svo þurfti stundum að leita uppi fólk sem bjó í nr. 48 og 49 sem er í raun iðnaðarhúsnæði nær höfninni.