Hús dagsins: Brekkugata 3

Í síðustu færslu brugðum við okkur uppá Brekku að Gamla Húsmæðraskólanum eftir að hafa dvalið við tvö sambyggð hús neðst í Brekkugötu en nú förum við aftur niður í miðbæ og númer þrjú við Brekkugötu stendur háreist bárujárnshús. En Brekkugata 3 mun byggð um 1904. Húsið er þrílyft timburhús á háum steyptum kjallara, sem er það hár að húsið mætti teljast fjögurra hæða.  Það hefur líkast til ekki verið svona stórt í upphafi en á mynd sem er á bls. 174 í bók Steindórs Steindórssonar sem tekin er til austurs í brekkunni ofan við húsið virðist húsið tvílyft með lágu risi, ekki ósvipað húsunum við Hafnarstræti 29-41, sem eru frá svipuðum tíma. Sú mynd er sögð tekin á árunum 1903-06. En á mynd frá 1927 á bls. 70 í sömu bók hefur húsið fengið núverandi lag, orðið þrjár hæðir á kjallara en ekki er útilokað að byggt hafi verið við húsið að aftan eftir það. Þá eru krosspóstar í gluggum og trúlega hefur húsið verið klætt bárujárni á svipuðum tíma og það var stækkað. Nú eru hinsvegar póstalausir gluggar á framhlið. Húsið hefur gegn um tíðina hýst ýmsa starfsemi, verslanir, skrifstofur og hundruð manna- ef ekki þúsundir hafa búið í húsinu. Það er í góðri hirðu, hefur verið tekið í gegn bæði að utan og innan. Nú er veitingastaður á jarðhæð og að ég held fimm íbúðir á efri hæðum, þar af þrjár leiguíbúðir . Þessi mynd er tekin 8.des. 2012.

Í upphafi mun þetta hús hafa verið svipað þessum húsum sem standa við Hafnarstræti:

Heimildir: Steindór Steindórsson. 1993. Akureyri; höfuðborg hins bjarta norðurs. Reykjavík: Örn og Örlygur.