Hús dagsins: Grundargata 1

Ég hef haldið mig Oddeyrina síðustu vikurnar og mun halda áfram næstu daga en nú ætla ég að taka fyrir stystu þvergötuna út úr Strandgötu, Grundargötuna á einu bretti í fjórum pistlum. Tvö hús hef ég áður tekið við götuna og mun ég endurbirta þá umfjöllun í síðasta pistli mínum um Grundargötuna. En við götuna standa aðeins sex hús, frá 1-7 en Grundargata 2 fyrirfinnst ekki og ekki veit ég til þess að það hús hafi nokkurn tíma staðið.

En byrjum á húsinu hér á myndinni, þ.e. Grundargötu 1. En húsið er byggt 1924  af Ólafi Ágústssyni húsgagnasmiði sem reisti og átti Strandgötu 33 og var þetta hús byggt sem smíðaverkstæði. . Það var stækkað fjórum árum seinna , hvort að risið var byggt ofan á húsið þá. Síðar voru þessi tvö hús tengd saman með einlyftri steinsteypubyggingu og húsið innréttað sem íbúð en í tengibyggingunni milli hússins og Strandgötu var um tíma sjónvarpsver Stöðvar 2 og seinna kvikmyndafyrirtækið Samver.  Grundargata 1 glæsilegt hús í góðu sandi. Það er einlyft steinsteypuhús með háu risi og miðjukvisti. Þak er klætt járni sem líkir eftir steinskífuklæðningu en slík klæðning mun upprunalega hafa verið á þaki- skv. gömlum myndum. Margskiptir póstar eru í gluggum. Húsið er einbýlishús en önnur íbúð er í tengibyggingu sem ég er ekki viss hvort telst vera númer 1a eða 1b eða mögulega Strandgata 33a eða b. Þessi mynd er tekin að kvöldi 6.júní 2013.

Athugasemdir

[Ólafur Ágústsson (IP-tala skráð) 16.6.2013 kl. 08:13]

Þegar afi byggir þetta hús, þá var risið mikið lægra og enginn kvistur. 1928 byggir hann á bakvið þetta hús og þar var hann með vélarnar, en þar réði ríkjum Magnús Albertsson, sem bjó í Grundargötu 3.  1944 byggði afi á milli Strandgötu 33 og Grundargötu 1. Þar voru hefilbekkir og annað sem tilheyrir húsgagnasmíði og innréttingasmíði. Þórarinn Ágústsson breytti þessu húsi í íbúð og lyfti efrihæðinni og byggði kvist á báðar hliðar. Síðar breytti hann millibyggingunni í aðra íbúð. Þessi hús bæði eru Grundargata 1. Kv. Óli

[Arnór Bliki Hallmundsson, 20.6.2013 kl. 11:59]

Sæll Ólafur. Takk kærlega fyrir þessar upplýsingar- svona heimildir eru ómetanleg viðbót og gera umfjöllunina lifandi og skemmtilega.

Kveðja, Arnór.