Fjarlægðarmörk...

Á þessari mynd (tekin 25. feb. 2018) má sjá Lækjargötu 4 (t.v.) og Lækjargötu 6. Þau eru orðin 150 og 134 ára, en Stefán Thorarensen byggði Lækjargötu 4 árið 1870 en þeir Þórður Thorarensen og Kristján Gíslason byggðu Lækjargötu 6 árið 1886. Húsin mynda nokkurs konar vinalegt "hlið" inn í Innbæinn um Spítalaveginn, sem tengist Lækjargötunni á milli stafna hinna geðþekku öldunga. Spítalavegurinn er örmjór á milli húsgaflanna, rétt um fimm metrar. Ef bilið milli þessara tveggja húsa væri hins vegar innan við tveir metrar, er jafnvel óvíst að þau stæðu enn: Það hefur nefnilega kviknað í báðum húsunum; annars vegar í febrúar 1936 og hins vegar í janúar 1998. Hefði bilið milli þeirra verið innan við 2 metrar hefðu þau e.t.v. bæði eyðilagst- ef ekki í fyrra skiptið þá mögulega það seinna. Væntanlega skilst meiningin með þessari "dæmisögu"- enda þótt tenging sé e.t.v. langsótt.....Virðum 2 metra regluna.

Ekki tímabært að herða aðgerðir

Athugasemdir

[Þorsteinn Briem, 6.8.2020 kl. 12:07]

Þegar bilið á milli fólks er minna en tveir metrar hefur nú margt ástarbálið kviknað og mýmörg dæmi um það á Akureyri, til dæmis í Sjallanum, sællar minningar.

En aðstoðarslökkviliðsstjórinn Ingimar Eydal slökkti alla elda á Akureyri.

[Arnór Bliki Hallmundsson, 6.8.2020 kl. 17:06]

Já, ástarbálið dreifir sér svo sannarlega best í innan við tveggja metra millibili.

Meistari Ingimar slökkti vissulega alla elda á Akureyri og nærsveitum, en hefur vafalítið magnað upp margann ástareldinn í Sjallanum 

https://www.youtube.com/watch?v=TTiq24OdH94&list=PL_Sba_sMV0zYRBpIbELcHXIJap4KhtLvp

[Þorsteinn Briem, 6.8.2020 kl. 20:00]

Frábær hljómsveit!

[Ingibjörg Ingadóttir (IP-tala skráð) 7.8.2020 kl. 16:19]

Sæll. Þetta hús sem kviknaði í 1936, er það húsið sem var notað sem fangelsi? Ég hef lesið um þetta í bókum Jóns Hjaltasonar, en ég á þær ekki, þær voru frá bókasafni.

[Arnór Bliki Hallmundsson, 7.8.2020 kl. 21:46]

Sæl og blessuð.

Það er rétt að húsið sem notað var sem fangelsi, Ráðhúsið, stóð á þessum slóðum örlítið norðan og vestan Lækjargötu 6, eða við Ráðhússtíg (síðar Spítalaveg) Miðað við þessa mynd stóð það u.þ.b. þar sem snjóruðningurinn er til hægri. Það hús brann hins vegar til grunna í janúar 1938 og varð ekki bjargað. .  

Á mynd sem sést á þessum tengli: https://sarpur.is/Adfang.aspx?AdfangID=1625689, örlítið hægra megin við miðju sést Ráðhúsið, neðst í gilinu og sjá má afgirtan fangagarð við það. Myndin mun tekin 1882, enda Lækjargata 6 ekki risin og nr. 4 aðeins ein hæð. Þarna er Ráðhúsið tiltölulega nýlegt (b. 1874), hvítt að lit og nokkuð glæst að sjá, en það mun víst hafa verið orðið nokkuð hrörlegt þegar það brann og þótti engin prýði.  

[Ingibjörg Ingadóttir (IP-tala skráð) 7.8.2020 kl. 22:37]

Takk fyrir svarið og myndina, hún er áreiðanlega í bók Jóns. En var einhver fangi þar inni sem fórst í brunanum?

[Arnór Bliki Hallmundsson, 7.8.2020 kl. 23:46]

Sæl.

Nei, sem betur fer var bruninn ekki mannskæður. Þeir voru víst ekki margir fangarnir á þessum árum, líklega voru þetta frekar eins konar fangageymslur en fullburðugt fangelsi. Maður nefndur Ástar- Brandur gisti þetta hús víst nokkuð oft, og sagt (hef ekki traustar heimildir fyrir þessu) að hann hafi staðið hoppandi af kæti á hæðinni ofan við og hrópað "Sumarhúsið mitt brennur, sumarhúsið mitt brennur". Lífseig kenning, um að hann hafi kveikt í húsinu, mun hafa verið afsönnuð á óyggjandi hátt; man ekki nákvæmlega hvernig en minnir það hafi verið fjarvistarsönnun, staðfest af konu, sem hann hitti þetta kvöld.