Útsýni af klöppum Brekkunnar.

Síðasta húsafærsla og nokkrar næstu verða um hús við Klapparstíg. Því er ekki úr vegi að skrifa eins og einn lítinn myndaþátt um klappir bæjarins.  Innan bæjarlands Akureyrar má finna ógrynni klappa og hvalbaka - sköpunarverk ísaldarskriðjökla. Nyrst á Brekkunni eru nokkrar voldugar klappir s.s. Hamarkotsklappir og ofar eru Skipaklöpp og Háaklöpp. Allt eru þetta fyrirtaks útsýnisstaðir- svo sem sjá má á eftirfarandi myndum.

 

 

 

 

 

 

 

 

 

 

 

 

 

Hér er horft til norðurs frá Hamarkotsklöppum um miðnæturbil 21.júní 2016.

 

 

 

 

 

 

 

 

 

 

Til suðurs frá Hamarkotslöppum neðri á Sumarsólstöðum 2016. Hvers vegna segi ég Hamarkotsklöppum neðri ? Jú, vegna þess að Hamarkotsklappir eru samheiti klapparholta sem ná frá svæðinu við Byggðaveg neðanverðan og Ásveg og að Gleráreyrum. Þessi hluti klappanna, sem í daglegu tali er kallaður Hamarkotsklappir kallast raunar Myllunef. (Sbr. Akureyri ; Höfuðborg hins bjarta norðurs e. Steindór Steindórsson, bls. 221).

 

 

 

 

 

 

 

 

 

 

 

 

 

Útsýn til hánorðurs af Hamarkotsklöppum (efri) vestan og ofan Þórunnarstrætis. Myndin er tekin síðdegis laugardaginn 25.febrúar 2017.

 

 

 

 

 

 

 

 

 

 

 

 

 

Í gildragi nokkru ofan Klettaborgar liggur skemmtilegur malarstígur upp að norðurenda Mýrarvegar á Brekkunni. Þar austan megin er klöpp nokkur, skógi girt, sem er ágætur útsýnisstaður. Ég hef alla tíð verið þannig að ég verð ævinlega að vita nöfn hverra þeirra náttúrufyrirbrigða sem á vegi mínum verða, hæð fjalla og byggingarár húsa og var lengi vel viðþolslaus að vita ekki hvað þessi klöpp héti- eða hvort hún bæri nafn. Um daginn hugkvæmdist mér svo að fletta upp í "Akureyrarbók" Steindórs Steindórssona og þar var svarið (en ekki hvað): Skipaklöpp. 

 

 

 

 

 

 

 

 

 

 

Hér er horft til SV af Skipaklöpp. Í forgrunni blokkir við Mýrarveg og hús við Kambsmýri. Myndirnar af Skipaklöpp eru teknar þann 23.okt 2016.

 

 

 

 

 

 

 

 

 

 

Háaklöpp nefnist klöpp nokkur sunnan og ofan Sólborgar. Hún er 84 m y.s. og líklega með betri útsýnisstöðum innan þéttbýlismarka Akureyrar. Hér er horft til austurs af henni 18.mars 2017.

 

 

 

 

 

 

 

 

 

 

 

 

 

Horft í hánorður af Háuklöpp. Borgir, rannsóknarhús Háskólans á Akureyrar í forgrunni.

 

Athugasemdir

[Sigurður Bjarklind (IP-tala skráð) 2.4.2017 kl. 12:21]

Sæll Arnór Bliki.

Það er þér að þakka að í morgun gekk ég á allar klappirnar frá austri til vesturs. Þrátt fyrir 40 ára búsetu á Akureyri hef ég ekki gert það áður en ég mun gera það aftur.

Með kveðju.

Sigurður Bjarklind.

[Arnór Bliki Hallmundsson, 2.4.2017 kl. 23:36]

Sæll Sigurður.

Virkilega gaman að heyra (eða öllu heldur lesa) þetta- það er alltaf ánægjulegt að vita til þess að skrifin manns veiti ánægju og vekji áhuga- í þessu tilfelli- á gönguleiðum. Mér fannst einmitt tilvalið að birta myndir frá þessum klöppum, því ég er viss um að margir bæjarbúar vita ekki af þeim og hversu skemmtilegir áningar- og útsýnisstaðir þær eru. (Þar á ég við efri klappirnar- flestir þekkja auðvitað Hamarkotsklappir neðri). 

Bestu kveðjur,

Arnór Bliki.