Hús við Bjarkarstíg

Hér eru umfjallanir um hús við Bjarkarstíg á neðanverðri ytri Brekku. Götunni var í upphafi ætlað að vera framhald af Krabbastíg en fékk þetta nafn sumarið 1943, en nánari umfjöllun um götuna er að finna í formála greinarinnar um Bjarkarstíg 1:

Bjarkarstígur 1  (1950)

Bjarkarstígur 2  (1943)

Bjarkarstígur 3  (1945)

Bjarkarstígur 4  (1943)

Bjarkarstígur 5  (1945)

Bjarkarstígur 6; Davíðshús (1943)

Bjarkarstígur 7  (1944)

Húsin við Bjarkarstíg eru byggð á sjö ára tímabili, frá 1943-1950, og á hinu nýja ári, 2019, er meðalaldur þeirra um 74 ár.

Hús við Hríseyjargötu

Hér eru söguágrip um hús við Hríseyjargötuna eins og hún leggur sig, syðri og eldri hlutann tók ég fyrir af og til árin 2011-17 en yngri og ytri hlutann tók ég fyrir hús fyrir hús nú í nóvember og desember 2018. Hríseyjargata er stórmerkileg og skemmtileg gata, við hana má finna líklega elsta steinsteypuhús Akureyrar þ.e. Hríseyjargötu 1, sem byggð er 1903(sést fremst t.v. á efri myndinni til hliðar). Það hús er jafnframt það langelsta við götuna, að öðru leyti er gatan byggð á 3.- 5. áratug 20. aldar- auk þess sem eitt hús frá 1. áratug 21. aldar stendur við götuna. Meðfylgjandi myndir eru teknar annars vegar við Strandgötu, horft til norðurs, og hins vegar við ytri enda götunnar viðEyrarveg og eru þær báðar teknar sunnudaginn 18. nóvember! Þó má greinilegt þykja, að ekki eru myndirnar teknar samdægurs en tilfellið er, að önnur myndin er tekin 2012 en hin 2018.

 

 

 

  

Hríseyjargata 1  (1903)

Hríseyjargata 2  (1925)

Hríseyjargata 3 (1937)

Hríseyjargata 5  (1922)

Hríseyjargata 6  (1931)

Hríseyjargata 7  (2002) *SJÁ hér að neðan

Hríseyjargata 8  (1942)

Hríseyjargata 9  (1928)

Hríseyjargata 10 (1942)

Hríseyjargata 11  (1933)

Hríseyjargata 13  (1942)

Hríseyjargata 14  (1941)

Hríseyjargata 15  (1942)

Hríseyjargata 16  (1942)

Hríseyjargata 17  (1943)

Hríseyjargata 18  (1941)

Hríseyjargata 19  (1942)

Hríseyjargata 20  (1941)

Hríseyjargata 21  (1942)

Hríseyjargata 22  (1941)

Sé tekið meðaltal af byggingarárum fæst út 1939,1 þ.a. að árið 2019 verður meðalaldur húsa við Hríseyjargötu 80 ár. 

*Lóðin við Hríseyjargötu 7 var framan af óbyggð en árið 2002 var byggt þar glæsilegt einlyft bárujárnsklætt timburhús með háu risi, eftir teikningum Ágústs Hafsteinssonar. Það er sérlega vel heppnað hús og passar mjög vel inn í hina rótgrónu götumynd. Myndina af Hríseyjargötu 7 tók ég núna fyrr í dag, 29. des 2018.  

Hús dagsins: Hríseyjargata 10

Hríseyjargötu 10 reisti Kristján Stefánsson 1946 eftir teikningum Tryggva Jónatanssonar, mögulega þeirri sömu og að Hríseyjargötu 8 .  Kristján ólst upp í Strandgötu 43, sem stendur aðeins spottakorn frá Hríseyjargötu, en faðir hans, Stefán Jónasson, byggði það hús árið 1920. Hríseyjargata er einlyft steinsteypuhús með lágu valmaþaki, bárujárn er á þaki og lóðréttir póstar í gluggum. Á útskoti við suðurhlið er stór gluggi af þeirri gerð sem síðuhafi kallar „stofuglugga“ og er hann skemmtilega innrammaður af múraðri grjóthleðslu eða hleðslumunstri. Þar mun vera um að ræða viðbyggingu frá 1964, eftir teikningum Tryggva Sæmundssonar . Kristján Stefánsson og kona hans, Kristín Jensdóttir bjuggu hér allt til ársins 2003 eða í 57 ár og ræktuðu m.a. myndarlegan skrúðgarð. Elsta heimild sem timarit.is finnur um húsið er einmitt frá ágústlokum 1951 þar sem Kristján hlaut 1. verðlaun Fegrunarfjelags Akureyrar fyrir vel hirtan skrúðgarð við húsið.  Enn standa nokkur gróskumikil birki- og reynitré á lóðinni og upprunaleg girðing að lóðarmörkum, steyptir stöplar með járnavirki. (Gaman að geta þess, að á þessari baksíðu Moggans, er greinir frá verðlaunum Kristján fyrir skrúðgarðinn ber mest á mynd af  Jóhanni Svarfdælingi, býsna vígalegum í hlutverki ógurlegs risa í Hollywood kvikmynd).  Hríseyjargata 10 er látlaust og skemmtilegt hús og í góðri hirðu. Hleðsla við glugga á framhlið ljær húsinu skemmtilega ásýnd og sérstakan svip. Myndin er tekin á verkalýðsdaginn, 1. maí árið 2017.

Heimildir: Guðný Gerður Gunnarsdóttir og Hjörleifur Stefánsson (1995). Oddeyri Húsakönnun. Minjasafnið á Akureyri. Aðgengilegt á pdf formi á slóðinni http://www.minjastofnun.is/media/husakannanir/Husakonnun_Oddeyri.pdf

Hús dagsins: Hríseyjargata 8

Hríseyjargata byggðist upp á löngum tíma eða frá aldamótum 1900 og fram undir miðja öldina. Byggingarsögulega mætti skipta henni í tvennt við Eiðsvallagötu, en norðan hennar er yngsti hluti hennar, skipaður steinhúsum í funkisstíl, einlyftum með valmaþökum. Sunnan Eiðsvallagötu má finna timbur- og steinhús, flest byggð á 3. og 4. áratugnum. En austanmegin á partinum milli Gránufélagsgötu og Eiðsvallagötu má einnig finna sams konar hús og norðan Eiðsvallagötu, þ.e. hús nr. 8 og 10.  

Hríseyjargötu 8 byggði Tryggvi Jónatansson eftir eigin teikningum árið 1942. Húsið er einlyft steinsteypuhús með lágu valmaþaki og hornglugga til SV og útskoti til SA. Á þaki er bárujárn, steiningu á veggjum og í gluggum lárétta póstar með opnanlegum þverfögum. Líklega hefur Tryggvi Jónatansson ekki búið hér þótt hann hafi reist húsið, en í elstu heimildum sem koma upp varðandi Hríseyjargötu 8 kemur fyrir nafn Steingríms Sigurðssonar vélsmiðs, en haustið 1943 auglýsir hann í Degi „húspart til sölu“ Líklega er þó ekki um að ræða Hríseyjargötu 8 í því tilfelli því fram kemur að í umræddum húsparti sé kjallarageymsla. Ýmsir hafa búið hér um lengri eða skemmri tíma, um langt árabil þau Ingólfur Árnason frá Neðstalandi í Hörgárdal og Margrét Magnúsdóttir, sem fædd var á Hafnarnesi við Fáskrúðsfjörð. Húsið er líkast til að mestu óbreytt frá upphafi.  Um 1990 var unnin Húsakönnun á vegum Minjasafnsins á Akureyri um Oddeyrina, á svæði sem afmarkaðist af Glerárgötu í vestri og til með Eiðsvallagötu í norðri og Hjalteyrargötu í austri. Þar er húsið ekki talið hafa varðveislugildi en vikið er að húsaröð Tryggva Jónatanssonar við Ægisgötu [1-14], enda þótt þau hús standi utan könnunarsvæðis og segir m.a. að þau séu „ [...] merkur þáttur í húsagerðarsögu Akureyrar og eru merkt framlag til að bæta híbýlahætti [...]“ (Guðný Gerður Gunnarsdóttir og Hjörleifur Stefánsson 1995: 107). Þar er jafnframt tekið fram, að hús nr. 8 og 10 séu af svipaðri gerð og umrædd hús. Myndin er tekin þann 1. maí 2017.

Heimildir: Guðný Gerður Gunnarsdóttir og Hjörleifur Stefánsson (1995). Oddeyri Húsakönnun. Minjasafnið á Akureyri. Aðgengilegt á pdf formi á slóðinni http://www.minjastofnun.is/media/husakannanir/Husakonnun_Oddeyri.pdf

Jólakveðja

                      

               (Jólamyndin í ár er tekin við Fálkafell sunnudaginn 9. des sl.og sýnir Akureyri og Vaðlaheiði í vetrarbúningi).

Hús dagsins: Hríseyjargata 22

Ég birti pistil um Hríseyjargötu 19 þann 19. og nr. 20 þann 20. og þá er auðvitað ekki um annað að ræða en að fylgja því eftir. Í dag er 22. des, dagurinn eftir vetrarsólstöður, og hér Hríseyjargata 22 en byggði hinn valinkunni bátasmiður Nói Kristjánsson árið 1942. Ekki verða hins vegar pistlar um 23, 24 eða ofar einfaldlega vegna þess, að hæsta númer við Hríseyjargötu er einmitt 22. Um Hríseyjargötu 21 skrifaði ég í febrúar 2011.  

Kristján Nói Kristjánsson, kallaður Nói bátasmiður, fékk árið 1941 lóð við Hríseyjargötu, hornlóð við Eyrarveg. Fékk hann að byggja íbúðarhús, á einni hæð og kjallaralaust, 14x9m að grunnfleti, steinsteypt og þiljað að innan með timbri og þak járnklætt úr timbri. Teikningarnar að húsinu gerði Tryggvi Jónatansson. Sú lýsing byggingarnefndar á enn við húsið; það er einlyft steinsteypuhús með valmaþaki og útskoti til norðausturs. Gluggar eru með einföldum lóðréttum fögum og bárujárn á þaki en veggir múrsléttaðir.  

Nói bátasmiður, sem var frá Innri- Lambadal í Dýrafirði, hóf að stunda skipasmíðar á Akureyri 1924 starfrækti skipasmíðastöð sína um áratugaskeið og smíðaði marga stærri og smærri báta. Þeirra stærstur var Fagriklettur sem gerður út frá Hafnarfirði, 135 tonn. Trillur, hringnótabáta og snurpubáta og „sand af árabátum“ að eigin sögn smíðaði hann, auk þess sem hann smíðaði fjóra 48 tonna báta fyrir Nýsköpunarstjórnina. Hér má sjá mynd af Gylfa EA628 sem Nói smíðaði fyrir Valtý Þorsteinsson í Rauðuvík árið 1939. Nói var sérlega afkastamikill og víðfrægur fyrir báta sína og skip og þegar Erlingur Davíðsson  heimsótti hann hingað í Hríseyjargötu 21 í fyrsta bindi bókaflokksins Aldnir hafa orðið árið 1972 var hann enn að, 76 ára gamall (Nói var fæddur 1896). Erlingur gaf sex árum síðar út ævisögu Nóa, sem kallaðist einfaldlega „Nói bátasmiður“.  Kristján Nói Kristjánsson lést 1983.  

Húsið, sem  er það ysta við austanverða Hríseyjargötu, er næsta lítið breytt að ytra byrði frá upphafi og í mjög góðri hirðu, þak virðist t.d. nýlegt sem og hurðir og gluggar. Það er hluti skemmtilegrar og samstæðrar heildar funkishúsa með valmaþökum frá árunum 1940-43 og kallast sú heild einnig skemmtilega á við aðra sambærilega röð, eilítið eldri við Ægisgötuna, næst vestan við. Snyrtilegir runnar eru á lóðarmörkum og er húsið og lóðin til mikillar prýði á þessum stað, horni Eyrarvegar og Hríseyjargötu. Myndin er tekin sunnudaginn 18. nóvember 2018 en þá var síðuhafi á vappi um Hríseyjargötuna með myndavélina, í haustblíðu og nærri 10 stiga hita.

Heimildir: Byggingarnefnd Akureyrar. Fundargerðir 1941-48. Fundur nr. 882, 22. ágúst 1941. Óprentað og óútgefið, varðveitt á Héraðsskjalasafninu á Akureyri.

Erlingur Davíðsson. 1973. Aldnir hafa orðið I bindi: Nói bátasmiður. Akureyri: Skjaldborg.

Hús dagsins: Hríseyjargata 20

Ég birti pistil um hús nr. 19 þann 19. ætli það sé þá ekki einboðið að birta pistil um nr. 20 þann 20.  

Skapti Áskelsson skipasmíðameistari, löngum kenndur við Slippinn, fékk árið 1941 lóð við Hríseyjargötu „þriðju lóð norðan við hús Bjarna Þorbergssonar“. [Þar er átt við hús nr. 14, sem þá var eitt húsa risið austanmegin við Hríseyjargötu, norðan Eiðsvallagötu] Þá fékk hann að byggja á lóðinni hús á einni hæð úr steinsteypu og með timburþaki, 8,80x8,20m að grunnfleti. Tók byggingarnefnd fram, að óvíst væri hvort hægt yrði að leggja vatn að lóðinni fyrst um sinn. Tveimur árum síðar fékk Skapti að reisa viðbót við hús sitt, steinsteypta byggingu með timburþaki, 5,0x3,0m að stærð.

Hríseyjargata 20 er einlyft steinsteypuhús með nokkuð háu valmaþaki. Á þaki er stallað bárujárn, sem síðuhafa þykir ævinlega freistandi að kalla skífustál vegna þess hve áferðin minnir á steinskífuklæðningu og veggir eru einangraðir með frauðplasti og múrhúðaðir. Lóðréttir póstar með opnanlegum þverfögum eru í gluggum. Á lóðinni er einnig bílskúr norðaustanmegin á lóð og byggt var við húsið til norðurs, eftir teikningum Haraldar Árnasonar, teiknistofu HSÁ. Skapti Áskelsson, sem fæddur var á Austari-Krókum í Fnjóskadal árið 1908, má með sanni segja, að hafi verið einn af máttarstólpum akureyrsk atvinnulífs á 20. öld. Hann, ásamt fleirum, tók árið 1946 nýbyggða dráttarbraut bæjarins á leigu og 22. nóvember 1952 var haldinn stofnfundur Slippstöðvarinnar, sem var lengi vel ein helsta skipasmíðastöð landsins og einn af helstu atvinnurekendum bæjarins. Síðar stofnaði Skapti, ásamt Hallgrími syni sínum byggingavöruverslunina Skapta hf.  Og starfaði sú verlsun fram yfir 1990. Bragi Sigurjónsson ritaði ævisögu Skapta Áskelssonar árið 1985 og hét sú bók einfaldlega „Skapti í Slippnum“.  Í minningargrein um Skapta, sem lést árið 1993 segir Bragi „ Um fjölda ára stigu fáir mikilúðlegri né eftirtektarverðari menn um götur Akureyrarkaupstaðar en Skapti Áskelsson, Skapti í Slippnum, eins og Akureyringum var lengi tamast að kalla hann.“  (Mbl. 15.7.1993: 14).

Skapti og eiginkona hans, Guðfinna Hallgrímsdóttir frá Glúmsstöðum í Fljótsdal, bjuggu hér ásamt börnum sínum í fimm ár, en 1946 byggðu þau hús við Norðurgötu 53. Ýmsir hafa átt og búið í Hríseyjargötu 20 síðan þá, en húsinu hefur líkast til alla tíð verið vel við haldið. Alltént er húsið í afbragðs góðri hirðu, nýtt þak á húsinu og hefur allt fengið yfirhalningu. Lóðin er einnig vel frágengin og smekkleg, við húsið er vandaður sólpallur, tjörn með timburbrú svo fátt eitt sé nefnt. . Eftir því sem sá sem þetta ritar kemst næst hefur ekki verið unnin húsakönnun fyrir þennan ytri hluta Hríseyjargötu þannig að varðveislugildi Hríseyjargötu 20 liggur ekki fyrir. Það er hins vegar álit þess sem þetta ritar, að Hríseyjargatan sem heild eigi öll að njóta varðveislugildis. Myndin er tekin þann 18. nóv. 2018. Myndin er tekin þann 18. nóvember 2018.  

Heimildir: Byggingarnefnd Akureyrar. Fundargerðir 1941-48. Fundur nr. 878, 4. júlí 1941. Fundur nr. 948, 2. júlí 1943. Óprentað og óútgefið, varðveitt á Héraðsskjalasafninu á Akureyri.

Hús dagsins: Hríseyjargata 19

Úr Bjarkarstígnum bregðum við okkur aftur að funkishúsaröðinni við utanverða Hríseyjargötu, og nú er komið að Hríseyjargötu 19, sem byggð er 1941-42.

Lúðvík Jónsson fékk árið 1941 lóð við Hríseyjargötu ásamt byggingarleyfi. Hann fékk að reisa íbúðarhús, steinsteypt hús á einni hæð með valmaþaki, veggir hlaðnir úr r- steini og þak járnklætt úr timbri. Stærð hússins 7,10x8,25m eða um 60 m² að grunnfleti. Ekki fylgir sögunni hver teiknaði, en á Landupplýsingakerfinu má finna raflagnateikningar af húsinu eftir Eyjólf Hjörleifsson.  Þeim sem þetta ritar þykir húsið svipa þó nokkuð til húsa nr. 5-8 við Ægisgötu, sem Tryggvi Jónatansson teiknaði og voru byggð árin 1936-39. Hríseyjargata 19 er einlyft steinhús með valmaþaki með horngluggum á suðurhlið, í anda funkisstefnunar. Bakálma er til norðvesturs með aflíðandi einhalla þaki og verönd við bakhliðina. Krosspóstar eru í gluggum og bárujárn á þaki. Á NV horni lóðar er einnig bílskúr.

Lúðvík Jónsson hefur líklega búið þarna ein 8 ár, en hann auglýsir húsið til sölu í ársbyrjun 1950    og síðar sama ár búa þarna þau Sigurbjörn Yngvi Þórisson vélstjóri og Brynhildur Arnaldsdóttir, sem einmitt giftu sig þetta sumar, svo sem kemur fram undir dálkinum Bæjarfréttir í meðfylgjandi tengli. Sigurbjörn og Brynhildur bjuggu hér um árabil eða fram yfir 1980 (hann lést 1981), en ýmsir hafa búið hér síðan. Húsið er næsta lítið breytt frá upphafi, en árið 1995 voru gerðar teikningar að viðbyggingu til suðurs ásamt nýjum gluggum, en hið síðarnefnda virðist aðeins hafa orðið raunin. Húsið er í afbragðs góðri hirðu og lítur vel út, nýlegir (um 20 ára) gluggapóstar gefa húsinu einnig skemmtilegan svip. Lóðin er einnig vel gróin og vel hirt, þar ber mikið á gróskumiklu birkitré sunnan húss, framarlega á lóð (þó ekki sé gróandinn mikill á meðfylgjandi mynd sem tekin er um um miðjan nóvember). Við götu er einnig steinveggur með járnavirki, mjög vel við haldið og líklega upprunalegur. Í stuttu máli, er Hríseyjargata 19 látlaust og smekklegt hús í góðri hirðu og hús og lóð til mikillar prýði í umhverfinu. Ein íbúð er í húsinu og hefur verið alla tíð. Myndin er tekin þann 18. nóv. 2018.

Heimildir: Byggingarnefnd Akureyrar. Fundargerðir 1941-48. Fundur nr. 917, 5. sept 1941. Óprentað og óútgefið, varðveitt á Héraðsskjalasafninu á Akureyri.

Hús dagsins: Bjarkarstígur 7

Eftir að hafa dvalið sl. vikur við Hríseyjargötu auk viðkomu í Glerárþorpi bregðum við okkur aftur í Bjarkarstíginn á Brekkunni. 

Síðla vetrar  1944 fékk Bragi Sigurjónsson, síðar alþingismaður og landbúnaðar- og iðnaðarráðherra, lóð vestarlega í Bjarkarstíg, næstu lóð við hornlóð við Helgamagrastræti og Bjarkarstíg. Í kjölfarið fékk byggja íbúðarhús, eina hæð á kjallara úr steinsteypu með flötu steinþaki. 9,5x8,3m að stærð auk útskota: að sunnan, 1,9x5m og vestan 1,0x4,7m. Litlu síðar fékk Bragi að breyta þaki hússins úr flötu í járnklætt valmaþak með steyptri þakrennu. Teikningarnar gerði Adam Magnússon trésmiður, sem skömmu áður hafði reist hús við Bjarkarstíg 2.

Sú lýsing sem gefin er upp í bókunum Byggingarnefndar á að mestu leyti við húsið enn í dag, það er einlyft steinsteypuhús á háum kjallara (raunar er kjallari það hár að sjálfsagt mætti kalla hann jarðhæð eða segja húsið tvílyft) með valmaþaki, útskoti til vesturs og steyptum tröppum og inngangi á efri hæð í kverkinni á milli álmanna. Steining er á veggjum og bárujárn á þaki en einfaldir póstar í gluggum.

Ein af helstu heimildum höfundum við ritun greinanna hér á síðunni er gagnagrunnurinn timarit.is. Það er ekki óalgengt, að sé íbúðarhúsi frá 5. áratugnum flett upp þar að um 50-70 niðurstöður komi upp. En sé Bjarkarstíg 7  flett upp á timarit.is birtast hvorki meira né minna en 514 niðurstöður og þar af 309 frá bilinu 1950-59. Ástæðan fyrir því er sú, að á þessum árum var Bragi Sigurjónsson ritstjóri Alþýðumannsins og var heimilisfangs hans getið í hverju einasta tölublaði. Bragi gegndi hinum ýmsu störfum gegn um tíðina, við kennslu og fulltrúi við almannatryggingar og útibústjóri Útvegsbankans og ritstjóri. Hann var kjörinn á Alþingi 1967 og sat þar til 1971, og sat sem landbúnaðar- og iðnaðarráðherra 1979-80 í ríkisstjórn Benedikts Gröndal. Bragi var auk þess rithöfundur og skáld. Meðal þekktustu rita Braga er líklega safnritið Göngur og réttir sem kom út á árunum 1948-53. Bækurnar hafa, eins og nafnið gefur til kynna, að geyma ýmsar frásagnir af göngum, gangasvæðum og gangna- og réttatilhögum, að ógleymdum svaðilförum og ævintýrum gangnamanna. Bragi bjó hér ásamt konu sinni Helgu Jónsdóttur allt til æviloka, 1995 en Helga lést ári síðar. Eins og gjarnt er þegar sömu eigendur eru að húsum frá upphafi og í áratugi – í þessu tilfelli ríflega hálfa öld- er húsið lítið breytt frá upphafi en að sama skapi í mjög góðri hirðu. Lóðin er einnig vel hirt og gróskumikil, þar eru m.a. mörg stæðileg birkitré, sérlega viðeigandi á Bjarkarstíg, sem Bragi og Helga hafa væntanlega gróðursett á sínum tíma. Á lóðarmörkum er einnig, eins og segir í Húsakönnun  2015 „upprunaleg vönduð girðing við götu“ (Ak. bær, Teiknistofa arkitekta 2015: 31) steyptir stöplar með járnavirki. Í sömu Húsakönnun er húsið metið með varðveislugildi sem hluti af þeirri samstæðu heild sem húsaröðin við Bjarkarstíg er. Meðfylgjandi mynd er tekinn í haustblíðunni þann 9. október 2018.

Heimildir: Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf

Byggingarnefnd Akureyrar. Fundargerðir 1941-57. Fundur nr. 969, 20. mars 1944. Fundur nr. 971, 14. Apríl  1944. Fundur nr. 983, 21. Júlí 1944. Óprentað og óútgefið, varðveitt á Héraðsskjalasafninu á Akureyri.

 

 

Hús dagsins: Hríseyjargata 18

Það er óneitanlega dálítið skemmtileg tilviljun, að maður frá Hrísey byggi hús við Hríseyjargötu. En kannski var það enginn tilviljun að Hríseyingurinn Þorgils Baldvinsson, sjómaður og verkamaður, skyldi sækja um lóð og byggingarleyfi við Hríseyjargötu. En það var árið 1941, og skyldi hús Þorgils vera ein hæð á lágum grunni með lágu valmaþaki, byggt úr r-steini, 8,8x7,2m að stærð auk útskots við NA- horn, 1,8x3m. Húsið er þannig ekki ósvipað þeim húsum sem risu við götuna um þetta leyti. Það fylgir hins vegar ekki sögunni hver teiknaði húsið.

Hríseyjargata 18 er einlyft steinhús með háu valmaþaki. Í gluggum eru lóðréttir póstar með opnanlegum þverfögum en bárujárn á þaki. Horngluggar í anda funkisstefnunar eru á SV horni. Þorgils, sá er byggði húsið,  bjó líklega aðeins 2 – 3 ár hér, því 1944 selur hann húsið og flytur aftur til Hríseyjar þar sem hann bjó alla tíð síðan ( hann lést 1967) Ýmsir hafa búið í húsinu gegn um tíðina, en sé heimilisfanginu flett upp á timarit.is koma upp 16 niðurstöður, sú elsta frá haustinu 1952 þar sem Edda nokkur Scheving, hér búsett, auglýsir eftir nemendum í upplestrartíma. Húsið er í megindráttum óbreytt frá upphafi. Árið 2003 var byggður bílskúr eftir teikningum Árna Gunnars Kristjánssonar, steypt bygging með flötu þaki á norðausturhorni lóðar  sem tengist húsinu við útskotið að norðaustanverðu. Mjög vel hefur tekist til við frágang og tengingu viðbyggingar við eldra hús.

Hríseyjargata 18 er smekklegt og látlaust hús í mjög góðri hirðu og til mikillar prýði. Lóð er einnig vel hirt og gróin, m.a. eru þar nokkur gróskumikil reynitré. Á lóðarmörkum er steyptur veggur með járnavirki, væntanlega upprunalegur. Eftir því sem sá sem þetta ritar kemst næst hefur ekki verið unnin húsakönnun fyrir þennan ytri hluta Hríseyjargötu þannig að varðveislugildi Hríseyjargötu 18 liggur ekki fyrir. Það er hins vegar álit þess sem þetta ritar, að Hríseyjargatan sem heild eigi öll að njóta varðveislugildis. Myndin er tekin þann 18. nóv. 2018.

Heimildir: Byggingarnefnd Akureyrar. Fundargerðir 1941-48. Fundur nr. 876, 6. júní 1941. Óprentað og óútgefið, varðveitt á Héraðsskjalasafninu á Akureyri.