Hús dagsins: Hlíðargata 7

Vorið 1939 fékk Jakob Ruckert vélsmiður lóð á leigu við vestanverða Hlíðargötu, þá fjórðu frá Lögbergsgötu. Fylgdi sögunni að ekki væru taldar líkur á lagningu götunnar það árið. Skömmu síðar fékk Jakob byggingarleyfi fyrir húsi úr r-steini; ein hæð á kjallara með steyptu þaki, 8,2x8,9m að stærð. Teikningarnar að húsinu gerði Halldór Halldórsson Eins og flestir vita var  Ísland hernumið af Bretum í maí 1940 og hefur Jakob þá líklega verið tiltölulega nýlega lokið við byggingu hússins. En við hernámið var Jakob , sem var þýskur, handtekinn af hernámsliðinu og fluttur af landi brott sem stríðsfangi. Jakob sneri þó aftur til Íslands tveimur árum eftir stríðslok eða 1947. Kona Jakobs, Anna Lárusdóttir Rist bjó áfram á Hlíðargötu 7 í nokkur ár og einnig bróðir hennar, Sigurjón Rist sem þá ók vörubílum og rak bifreiðaverkstæði. Hann varð síðar vatnamælingamaður og forstöðumaður vatnamælinga hjá Orkustofnun í áratugi, valinkunnur fyrir störf sín og frumkvöðull á því sviði.

Hlíðargata 7 er einlyft steinsteypuhús á lágum kjallara og með flötu þaki og háum þakkanti, með pappa á þaki og múrsléttuðum veggjum. Horngluggar eru til suðurs og einfaldir lóðréttir póstar í gluggum. Á miðri framhlið er inngangur, að þeim steyptar tröppur og dyraskýli sem skagar fram úr þakkanti. Á bakhlið er sólskáli og sólpallur úr timbri. Sólskálinn var byggður árin 1991 eftir teikningum Bjarna Reykjalín. Þakkantur mun einnig síðari tíma viðbót en að öðru leyti er þetta látlausa og snyrtilega funkishús óbreytt frá upphafi. Húsið er snyrtilegt og í góðri hirðu, sem og lóð sem er vel gróin. Þar er m.a. mjög gróskumikið grenitré (mögulega sitkagreni, ágiskun undirritað) norðaustanverð auk stæðilegs reynitrés norðvestanmegin. Húsið og lóðin er til mikillar prýði í umhverfinu og það er einnig skemmtilegur veggur á lóðarmörkum. Hann er lagður hraunhellum en að ofan er sérstök steypt girðing með e-k n-laga stöfum og þríhyrndum tindum að ofan. Húsið er metið með 1. stigs varðveislugildi í Húsakönnun 2015 og er einmitt veggur nefndur þar sérstaklega. Meðfylgjandi mynd er tekin þann 9. okt. 2018.

Heimildir: Byggingarnefnd Akureyrar. Fundargerðir 1935-41. Fundur nr.833 , þ. 5. maí  1939. Fundur nr. 839, 1. ágúst 1939. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf 

Hús dagsins: Hlíðargata 6

Árið 1944 fékk Guðmundur nokkur Jónsson,  leyfi til að reisa hús við Hlíðargötu 6. Húsið yrði ein hæð á kjallara úr steinsteypu með steinlofti og skúrþaki, 10,5x6,8m að stærð auk útskots að vestan að stærð 5x1,4m. Fullbyggt mun húsið hafa verið 1948, en það er a.m.k. skráð byggingarár hússins. Fullbyggt er e.t.v. skilgreiningaratriði, en árið 1964 var byggt við húsið til suðurs og vesturs, álma jafn há húsinu. Var sú bygging reist eftir teikningum Guðlaugs Friðþjófssonar, en hann teiknaði einnig upprunalega húsið.

Guðmundur Jónsson, sem byggði húsið, var um áratugaskeið forstjóri Olíusöludeildar KEA en var áður vörubílsstjóri hjá Stefni og aðstoðarforstjóri (annar forstjóri) þar. Kona hans var Jóhanna Gunnlaugsdóttir og bjuggu þau hér í 44 ár, eða til 1988. Síðan hafa ýmsir átt húsið og búið þar og alla tíð hefur húsið verið vel við haldið.

Hlíðargata 6 er tvílyft steinsteypuhús með lágu skúrþaki. Tvær smáar álmur eru til austurs þ.e. á framhlið og suðvesturs og við þá síðarnefndu eru svalir. Í kverkinni milli álma á framhlið eru inngöngudyr og steyptar tröppur upp að þeim. Horngluggar í anda funkisstefnunnar eru á húsinu, lóðréttir póstar í gluggum og stórir og víðir gluggar til suður á suðurálmu. Sú álma, sem er viðbygging, er múrsléttuð en upprunalegi hluti hússins er klæddur steiningarmúr. Bárujárn er á þaki. Á lóðarmörkum er steypt girðing með járnavirki, sem er í stíl við handrið á uppgöngu við útidyr og á svölum. Er hann í góðu standi, eins og húsið sjálft. Í húsinu eru tvær íbúðir. Í Húsakönnun 2015 er húsið metið með 1. stigs varðveislugildi sem hluti samstæðrar raðar húsa í funkisstíl.

Fremst á lóð stendur mjög gróskumikið og stæðilegt birkitré, væntanlega gróðursett af þeim Guðmundi og Jóhönnu um miðja 20. öld. Tréð er meðal hæstu birkitrjáa bæjarins og rataði það á sínum tíma í bækling Skógræktarfélags Eyfirðinga „Merk Tré“ árið 2005. Þar er hæð trésins sögð 12,25m en mögulega er það komið yfir 13 metra í upphafi árs 2019.  Hér má sjá mynd sem ég tók í Trjágöngu Skógræktarfélagsins um Brekkuna þann í ágústlok 2013, en myndin af húsinu er tekin þann 9. okt. 2018.

Heimildir: Byggingarnefnd Akureyrar. Fundargerðir 1941-48. Fundur nr.975 , þ. 12. maí  1944. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf 

afa.pdf 

Hús dagsins: Hlíðargata 5

Í mars 1941 fékk Friðjón Axfjörð lóð við Hlíðargötu, að vestan, þá þriðju frá Lögbergsgötu. Um haustið fékk hann að reisa steinsteypt íbúðarhús, 10,85x8,50m að stærð, eina hæð á háum kjallara með skúrþaki. Friðjón, sem jafnframt teiknaði húsið, var afkastamikill múrara- og byggingameistari og byggði eða kom að byggingu margra húsa, stórra jafnt sem smárra, og þá oft í félagi við Gaston Ásmundsson. Á teikningum sínum að húsinu  kallar Friðjón einmitt húsið „Hús Friðjóns og Gastons“. Nokkrum árum síðar byggði Friðjón hús á Bjarkarstíg 3,  en hann hefur líklega ekki verið búsettur lengi hér. Á meðal allra fyrstu íbúa hússins var frú Hólmfríður Jónsdóttir en hún lést 1944 og margir hafa búið hér síðan. Hlíðargata 5 er reisulegt funkishús, steinsteypt á kjallara með einhalla aflíðandi þaki og stölluðum þakkanti, og mjóu útskoti til norðausturs og inndregnum inngöngudyrum í kverk á milli. Þak er pappaklætt og einfaldir lóðréttir póstar í gluggum. Húsið einfalt og látlaust og í mjög góðri hirðu og til mikillar prýði. Húsið mun nokkurn veginn óbreytt frá upphafi að ytra byrði. Í Húsakönnun 2015 telst það hafa varðveislugildi sem hluti þeirrar samstæðu heildar sem húsaröðin við Hlíðargötu er. Þar er einnig tekið fram, að „Athuga mætti litaval betur með hliðsjón af stíl hússins“ (Ak.bær, Teiknistofa arkitekta 2015: 115). Þá var húsið grænleitt, en þegar meðfylgjandi mynd er tekin þann 9. Október skartar húsið hvítum lit. Ein íbúð er í húsinu.

Heimildir: Byggingarnefnd Akureyrar. Fundargerðir 1935-41. Fundur nr.868 , þ. 7. mars  1941. Fundargerðir 1941-48. Fundur nr. 884, 17. sept. 1941. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf 

Hús dagsins: Hlíðargata 4

Árið 1942 fékk Georg Jónsson lóð við Hlíðargötu og leyfi til að byggja hús, eina hæð á háum kjallara, byggt úr steinsteypu með skúrþaki. Húsið að stærð 10,1x7,45m að auki útskot að sunnanverðu 4,4x2,3m. Teikningar að húsinu gerði Stefán Reykjalín.

Hlíðargata 4 er einlyft steinsteypuhús með aflíðandi einhalla þaki, innrammað með stölluðum kanti og útskoti eða lítilli álmu til suðurs. Í kverkinni milli suðurálmu og húss eru steyptar tröppur og forstofubygging út timbri með miklum gluggum. Þak mun pappaklætt og einfaldir lóðréttir póstar í flestum gluggum en steiningarmúr á veggjum.  Steiningin (stundum ranglega kölluð skeljasandur) hefur það orð á sér að vera viðhaldsfrí, en víst er, að slitsterk og endingargóð er hún. Þessi klæðning var afar algeng á steinhúsum um og fyrir miðja 20. öld og í mörgum tilfellum sér lítið sem ekkert á eftir 70 – 80 ár. Fljótt á litið virðist svo vera tilfellið með Hlíðargötu 4 en ljóst má vera að húsið er í afbragðs góðri hirðu og hefur líkast til verið alla tíð. Árið 1992 var byggð lítils háttar viðbót við húsið, forstofubygging og tröppur eftir teikningum Gísla Kristinssonar. Að öðru leyti er húsið óbreytt á upphafi. Það hefur varðveislugildi skv. Húsakönnun 2015 sem hluti af samstæðri heild funkishúsa.  Tvær íbúðir eru í húsinu, hvor á sinni hæð og hefur verið svo frá upphafi, ef marka má teikningar. Myndin er tekin þ. 9. okt. 2018.

 

 

Heimildir: Byggingarnefnd Akureyrar. Fundargerðir 1941-48. Fundur nr.901 , þ. 6. mars  1942. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf 

Hús dagsins: Hlíðargata 3

Hlíðargötu 3 reisti Björgvin V. Jónsson málarameistari, frá Vatnsenda í Eyjafirði, árin 1943-44. Hann fékk lóð við „Hlíðarveg“  og byggingarleyfi í júní 1943, fékk að reisa íbúðarhús byggt úr steinsteypu, eina hæð á háum kjallara og með valmaþaki. Stærð hússins 7,4x10m auk útskota: að sunnan, 1,5x4,7m og að norðan 1,1x6,1m. Teikningarnar að húsinu gerði Páll Friðfinnsson.  Björgvin Jónsson kona hans Laufey Sigurðardóttir , sem byggðu húsið bjuggu hér um áratugaskeið, fram á efri ár. Hún var frá Torfufelli í Eyjafirði, en þess má geta að Torfufell er steinsnar- um tvo kílómetra-  Vatnsenda. Þessir tveir bæir eru framarlega í firðinum, í fyrrum Saurbæjarhreppi.  Björgvin og Laufey unnu ötullega að ýmsum félagsmálum og stofnuðu m.a. Minningarsjóð Hlífar til styrktar Barnadeildar FSA ( nú Sak). Hann lést 1983  en Laufey bjó hér áfram um nokkurt árabil. Húsið mun mest alla tíð hafa verið einbýlishús.

   Hlíðargata 3 er einlyft á mjög háum kjallara, raunar fast að því að teljast heil hæð, með flötu þaki sem er rammað inn af háum þakkanti. Horngluggar í anda funkisstefnunnar eru á suðurhlið, á báðum hornum og einnig á útskoti. Þar eru einnig tröppur upp að inngöngudyrum á efri hæð. Lóðréttir póstar eru í gluggum og pappi á þaki hússins.  Þá eru steyptar tröppur að götu og hellulögðu bílaplani sunnan og framan við húsið. Á norðurhlið hússins er áfastur bílskúr, byggður 1963 eftir teikningum Hauks Viktorssonar. Húsið er reisulegt og svipmikið hús og í mjög góðri hirðu og til prýði í skemmtilegri götumynd funkishúsa við Hlíðargötu. Í Húsakönnun 2015 er húsið metið með varðveislugildi sem hluti af samstæðri heild. Myndin er tekin þann 9. okt. 2018.

Heimildir: Byggingarnefnd Akureyrar. Fundargerðir 1941-48. Fundur nr.945 , þ.11. júní 1943. Fundur nr. 947, 25. júní 1943. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf

Hús dagsins: Hlíðargata 1

Þrjár þvergötur liggja upp og vestur úr Oddeyrargötu. Neðst og styst er Krabbastígur, fyrir miðri götunni er Hamarstígur, og efst er Lögbergsgata. Tvær tiltölulega stuttar götur liggja á milli þessara tveggja gatna, sú neðri nefnist Hlíðargata. Gatan liggur í A-V og er nokkuð brött neðst við Hamarstíg. (Mögulega klóra einhverjir sér í kollinum yfir þessari staðarlýsingu) Hlíðargata er að öllu leyti byggð árin 1939-48, enn þess má geta, að í upphafi árs 2019 er þar hús í byggingu. Hlíðargata er um 130 m löng, skv. lauslegri mælingu undirritaðs á kortavef ja.is .

Árið 1939 fékk Guðmundur Tómasson  lóð norðan við Lögbergsgötu og vestan Hlíðargötu, m.ö.o. hornlóð þessara tveggja gatna, og leyfi til að byggja íbúðarhús á einni hæð á kjallara með hallandi þaki, að stærð 9,25x7,0m með útskotum. Guðmundur gerði sjálfur teikningarnar að húsinu. Guðmundur Tómasson, sem var trésmiður, teiknaði nokkur hús á ytri Brekkunni, m.a. við Munkaþverárstræti. Hann var einnig forstjóri hinnar valinkunnu kexverksmiðju Lórelei. Hann bjó ekki lengi á Hlíðargötu 1 en fljótlega eftir byggingu fluttist hingað Arnheiður nokkur Skaptadóttir, lengst af skrifstofumaður og gjaldkeri hjá KEA. Margir hafa átt hér heima í lengri eða skemmri tíma, en húsið hefur alla tíð verið íbúðarhús.

  Hlíðargata 1 er einlyft steinsteypuhús á háum kjallara með hallandi þaki. Horngluggi er á SA horni en  „sneiðingur“ , 45°,  á SV horni. Húsið má heita nokkuð margbrotið en á suðurhlið, sem snýr að Lögbergsgötu er útskot og á vesturhlið er einnig útskot eða mjó álma þar sem eru inngöngudyr. Inngöngudyr á snýr mót suðri, inndregin og steyptar tröppur upp að henni, en inngöngudyr á kjallara til vesturs. Þá er viðbygging við húsið til norðurs, sem fellur vel að upprunalega húsinu. Sú bygging var reist árið 1967 eftir teikningum Birgis Ágústssonar. Í flestum gluggum hússins eru einfaldir lóðréttir póstar og bárujárn á þaki. Steining er á upprunalega hluta hússins en viðbygging múrsléttuð. Húsið er stórbrotið og skemmtilegt hús, útskotin gefa nokkurs konar „stuðla“ yfirbragð. Húsið er í góðri hirðu og til mikillar prýði. Þá setur frumlegt skraut, steypt skeifa ofan útidyra og vagnhjól á framhlið skemmtilegan svip á húsið, ásamt klifurjurt í kverk milli suðurhliðar og útskots. Lóð er vel hirt og gróin og þar eru m.a. gróskumikil reynitré. Í Húsakönnun 2015 er húsið sagt „Reisulegt og sérstakt hornhús í funkisstíl“  (Ak. Bær, Teiknistofa Arkitekta 2015: 113) og hefur 1. stigs varðveislugildi sem hluti heildar eða götumyndar.  Ein íbúð er í húsinu. Myndin er tekin þann 9. okt. 2018.

Heimildir: Byggingarnefnd Akureyrar. Fundargerðir 1935-41. Fundur nr. 834, þ. 30.maí 1939. Óprentað og óútgefið, varðveitt á Héraðsskjalasafninu á Akureyri.

Akureyrarbær og Teiknistofa Arkitekta, Gylfi Guðjónsson og félagar. (2015). Norðurbrekkan, neðri hluti. Húsakönnun. Akureyrarbær: Pdf-útgáfa aðgengileg á slóðinni http://www.akureyri.is/static/files/Skipulagsdeild/Deiliskipulog/Nordur_Brekka/n-brekka-husakonnun-150129-vefutgafa.pdf

Húsaannáll 2018

Að venju birti ég um áramót lista yfir þau hús sem ég hef tekið fyrir á liðnu ári. Hér birtast þær umfjallanir, sem ég birti á liðnu ári, 2018. Ég er misjafnlega iðinn við þetta, stundum líða jafnvel nokkrar vikur á milli, en stundum fáeinir dagar. En ég kalla þessa þætti engu að síður Hús dagsins, enda eru þau vissulega hús viðkomandi dags, sem þau birtast. En nóg um það. Á liðnu ári hélt ég mig að mestu við Ytri Brekku, en fyrstu og síðustu vikur ársins var ég staddur á Oddeyrinni. Þá reyndi ég það sem ég hafði lengi íhugað, og margir hvatt mig til, að koma hluta þessara skrifa út á bók og hóf söfnun á Karolina Fund um sumarið. Úr varð handrit upp á u.þ.b. 170 blaðsíður um neðri hluta Norðurbrekku, milli Grófargils og Hamarkotsklappa. Sú söfnun tókst svosem ekki, þannig að öll bókaútgáfuáform liggja enn sem komið er í salti eða súr hjá síðuhafa.  Færi þeim sem styrktu þessa söfnun hins vegar bestu þakkir fyrir, enn og aftur. 

11. jan. Fjólugata 11 (1938)

23. jan Fjólugata 13 (1938)

4. feb Fjólugata 15 (1938)

12. feb Fjólugata 12 (1945)

22. feb Fjólugata 14 (1944)

2. mars Fjólugata 16 (1941)

7. mars Fjólugata 18 (1943)

19. mars Fjólugata 20 (1943)

14. apríl Munkaþverárstræti 18 (1937)

26. apríl Munkaþverárstræti 17 (1937)

6. maí Munkaþverárstræti 19 (1938)

13. maí Munkaþverárstræti 20 (1936)

20. maí Munkaþverárstræti 21 (1937)

26. maí Munkaþverárstræti 22 (1936)

6. júní Munkaþverárstræti 23 (1937)

15. júní Munkaþverárstræti 24 (1938)

21. júní Munkaþverárstræti 25 (1937)

1. júlí Munkaþverárstræti 26 (1936)

8. júlí Munkaþverárstræti 27 (1940)

15. júlí Munkaþverárstræti 28 (1944)

19. júlí Munkaþverárstræti 30 (1942)

25. júlí Munkaþverárstræti 31 (1942)

29. júlí Munkaþverárstræti 32 (1946)

4. ágúst Munkaþverárstræti 33 (1948)

9. ágúst Munkaþverárstræti 34 (1943)

18. ágúst Munkaþverárstræti 35 (1941)

25. ágúst Munkaþverárstræti 37 (1942)

30. ágúst Munkaþverárstræti 38 (1943) 

9. sept.  Munkaþverárstræti 40  (1942)

13. sept. Munkaþverárstræti 42  (1942)

18. sept. Munkaþverárstræti 44  (1943)

20. sept. Munkaþverárstræti 29 (1951)

30. sept. Sniðgata 1  (1937)

9. okt. Sniðgata 2 (1935)

14. okt. Sniðgata 3 (1942)

24. okt Bjarkarstígur 1  (1950)

30. okt. Bjarkarstígur 2  (1943)

4. nóv. Bjarkarstígur 3  (1945)

8. nóv. Bjarkarstígur 4  (1943)

12. nóv. Bjarkarstígur 5  (1945)

16. nóv. Bjarkarstígur 6; Davíðshús (ath. endurbættur pistill frá 2011) (1943) 

25. nóv. Hríseyjargata 13  (1942)

29. nóv. Hríseyjargata 14  (1941)

1. des. Viðarholt; Sunnuhlíð 17 (1918)

6.des. Hríseyjargata 15  (1942)

8. des. Hríseyjargata 16  (1942)

12. des. Hríseyjargata 17  (1943)

15. des. Hríseyjargata 18  (1941)

17. des. Bjarkarstígur 7 (1944)

19. des. Hríseyjargata 19  (1942)

20. des. Hríseyjargata 20  (1941)

22.des. Hríseyjargata 22  (1941)

27. des. Hríseyjargata 8  (1942)

29. des. Hríseyjargata 10 (1942)

Árið 2017 skrifaði ég 56 pistla um jafn mörg hús, það yngsta byggt 1951 eða 67 ára en það elsta 100 ára, byggt 1918.Ef tekið er meðaltal byggingarára fæst 1940,963 sem er nær 1941, m.ö.o. er meðalaldur "Húsa dagsins" 77 ár árið 2018. Viðmiðið hjá mér í þessari umfjöllun, er almennt að "Hús dagsins" séu byggð fyrir 1940-50, að sjálfsögðu með undantekningum. 

Á þessu nýja ári, nánar tiltekið þann 25. júní, verða liðin 10 ár frá því ég hóf þessa vegferð (sem ég reiknaði allt eins með að myndi lognast út af hjá mér á nokkrum mánuðum). Sjálfsagt reyni ég að líta eitthvað til baka og gera eitthvað með þetta afmæli hér á síðunni, eftir því hverju ég nenni.  En umfjöllunarefni næstu vikna eru göturnar Hlíðargata og Holtagata á ytri Brekku. Þá eru þarna Lögbergsgata og einhver hluti Helgamagrastrætis, en þess má geta, að við síðarnefndu götuna standa ámóta mörg hús og öll "Hús dagsins" árið 2018, þ.a. ljóst má vera, að nóg er framboð af mögulegum "kandidötum" í Hús dagsins.   

Nýárskveðja

Óska lesendum og landsmönnum öllum gleðilegs nýs árs með þökk fyrir það liðna.

Þakka innlit og athugasemdir. Þess má geta, að hinu nýja ári verður þessi þáttur "Hús dagsins" og þessi síða 10 ára.  Nýársmyndirnar eru þrjár svipmyndir frá Akureyri og Eyjafirði, annars vegar teknar syðst á uppfyllingunni við Bótina (Miðbæinn) og Oddeyri, þar sem m.a. Menningarhúsið Hof stendur, skömmu fyrir klukkan 2 í dag; horft til suðurs FRAM Eyjafjörð og til vesturs í átt að Kirkjunni og Súlum. Hins vegar er þriðja myndin er tekin af Hamarkotsklöppum um klukkustund síðar, horft til norðurs í átt að Kaldbak.